JESUH THIHNAK

Hrang Nawl

                            

 

             Zerusalem saarthlaan Kolkattha cu a min hmanhah Luruh hmun ti va si kaw, ni dang ahcun king rengruangin a um, zanlei caan hoi ahcun minung cu vun chim lo , uifir hmanh anmah lawng cun a ning a `i hnga. Asinain nihin cu rel cawk lo minung an khat dah ngai! Chun nilin lingte asi i, huthut in a sa. Zapi nih vun phanh khawh awk loin Rome ralkap nih an kulhmi, lung hrelhhrolh lakah, Jesuh le mifir pahnih hna cu an dir. An liang an leh hna i , ralkap nih an hnulei in an tlaih hna .

            Jesuh le mifir hna cu an thil an phoih hna i , an taklawngin nilin ah zoh tlak loin an dir. An hmaika ah vailam thing pathum an chiah . Hling luchin hramhramin an rak chinh lio ah, a lu hmun tampi ah a pem i a thi le a thlan in a hma vialte a `ial dih. Tho nih an tlanh .Vun phenhainak kut zong cu a um ti fawn lo. Vailam thing ahcun ih an fial hna i , mifir pahnih hna cu an cawl, an ai, an kio. Ralkap nih an chuih, an lamh hna. Holh phun chia kipin an auh hna. Jesuh tu cu tuufa te bang amah ih in a it i, sersiam hau loin a za a zam. A kehlei mifir pa cu thir an khenh hmasa. A kio le a raak thawng cu mithla-kawk a bar ko.Minung aw hmanh a lo lo.

            Jesuh nu, Mary Makdalin le an hawile hna cu mi karlakah an det chih hna i, Jesuh pum zong cu an hun hmu kho lo. Mifir pa ai le hraam an vun theih ahcun an chungril aa let. A theih an ngamh lo. Jesuh nu cu, mei kangh hma cheem bantuk khin a thawin ‘aa ka fa’ tiah a ti lengmang.

            Jesuh cu, a zaa phahpiak cia ahcun thirkhenh hngete ngaw hi an vun hmuah i, hmakhat an vun khenh ahcun, titsa hrat cu thawng a ngei lo, ‘cuk’ a ti. A fah maw thei lo sual lai ti bang, kut hnihhnih in na vun khenhchap. A mit a sur, a kam aa seh i, awn au lo tein aa in. A kut khatlei cu an vun khenh `han . A fah tuk caah, a thaw chuah a sukin aa su. A kut a dih cun a ke hnihin thirkhenh ngan chinchinin an vun khenh. A nule nih cun,sobul thawng an theih . An hna an i phih, an ngai ngam lo. Mifir pakhat cu an vun ti ve i , ralkap pali nih an tlaih bu hmanh cun fawibai ah an khenh kho lo.

            Vailam thing cu an vun tun `han. Ai zoh ngam ti lo. Jesuh kut le kut cu thi a dordor in a tla. A ke thi cu, tidong hlung luanin a luang.

            A nganfah a celh lo i, a hnawng a mer lengmang. A nu nih voikhat te a hun zoh i, a `ih tuk ah, raihraang therh in a therh. Mary Makdalin cu siksek in a `ap. Jesuh nau hniang Saimon vun zoh ko ah, lung a faak. A mitthli kurkur in a luang. A kam aa seh, a kut a tum, a samh, a tum a samh . An hna hram in, tlangbawi le cathiam hna nih “Zudah siangpahrang ka si na hei ti, mi na khamh khawh hna ah vun i khamh ngat” tiah cil an hei chaak, an nih a chuak na lo cun, an i nihter. Saimon cu a thinhun a celh lo. A pawng bik a dirmi tlangbawi cu vun zuanhnawh a zalh i, a nu nih a mit au cu vun hmu kaw, ‘ka fate’ tiah a tlaih.

            Mah ti Jesuh nganfah i ai ngerh len lio ahcun a kehlei mifir pa nih ,“ Hei! Nazaret mipa, Khrih ka si na ti lo mei, vun i khamh tuah. Kanmah zong hi vun kan khamh chih tuah ,” tiah a ti pah, ai! tiah a ai pah. Khatlei ummi pa nih, “Maw, mifir `ha lo, na thih cuahmah lio hmanhah Pathian na `ih hin lo mu, Kanmah bantuk sualnak ngei ah dara na ruah hi,” tiah thinhung ngai in a vun ti . Jesuh lei a hoih i, “Jesuh, na Pennak na phaak tikah kei misual hi vun ka philh hlah mu,” tiah mitthli he a vun ti . Jesuh nih a celh na loin a hmai a vun panh i, “Bia ngaite kan chimh, keimah he Paradise ah na um lai,” tiah a hna a vun ngamter. Mifir pa cu lunglawmh tukah a lung a hno chin i, a `ah pah in, “Ka bawipa, ka nunchung vialte ka lung retheihnak cu, thilrit bang a tla cang. Hiti thih zong hi a ka fahter ti lo,” tiah a  ti.

            Mah ti mifir hna he an i chawnh cu a langin an hun hmuh nain, zeibia an chim cu an thei lo. Nganfah nem deuhnak ah tiah ralkap nih sii phun khat an vun chanh hna. Jesuh cu a ding duh lo. A nu nih a um nakin, “Ding hen ka fa,” tiah a rak ti lengmang. Hramhramin mi an keu hna i, vailamthing cu an hun naih deuh. Jesuh nih a mit a vun leh i, a nu le Zerusalem khuami Zan nih a dirpi hna kha a vun hmuh hna. A nu cu a vun zoh i, thei ual theilo ual khan “Zoh hmanh na fapa kha” tiah a ti. Zan cu a vun zoh ve i, “Zoh hmanh na nu kha,” tiah a ti ve `hiam`hiam.

            Mahticun zoh ngam lo nganfak in, ni her sang tiang a um, “ Ka ti a haal” a ti i, ralkap nih fung ah puanchia an men an men i mah puanchia paar cu mitsurhang thor ah an hnim i, “Heh, tikik te hi ding tuah,” tiah a kaa ah an hun tuh.

            Cun suimilam pathum hrawng ahcun a thi chuah cu aa zia deuh. Asinain a hma tho nih a tlanh i, sivang in an tuah. Nilinh zong cu a dai hlei lo. Mary Makadalin nih Jesuh hmai cu a zoh ngam lo . Vak tiah voikhat a hei zoh tawn i, a mit a chinh `han `heo. A mitthli tamtuk a tlaak cang caah a mit vialte a phing dih. A lung chung cu a `ap zungzal `hiam`hiam.Khua a phunphun a ruat. Jesuh a nun lio i, “Na sualnak cu ngaihthiam a si cang,” tiah a rak ti. A lunglawmh tuk i a mitthli a rak tlaak. Jesuh ke cung i a rak tlaak sual i, a sam i a rak hnawhpiak hoi kha a vun thei. Vailamthing cu a hei zoh `han i, awk filfial in a nganfah mah tluk a ti na, kaa khatte hmanh holh phun chia a vun chim lo. Hnahno ziik vun khiah, hmal, le par corhno vun hmeh bang, uai hninhniang in. Ka thin, maw ka sian lo a vun ti lioah khin Jesuh orhlei ke, thir an khenhnak hma in thi thar bawhlawhlok tiah a hung chuak i, a titsa vialte a caang dih. Nunnem sualnak ngei lo, mitcaw, kebei damtertu, sifak michia le mi thurhnawm dawtu, mi zoh tlaak loin lainawng bang an in taar mu tlangbawi rual nih cun, tiah a lungin a ti. Mah ahcun Jesuh cu a nganfah a hung zual i, ai ngerh lengmang. A hun zoh ah, a chungril vialte aa let dih. “Ka zoh ngam lo, ka zoh ngam lo,” a ti i hnulei a chit.

            Ka zoh ngam lo an hliamnak hma liangluang,                                                                                                Mi sa-ei pawpi le cakei hraang an si kun lo,                                                                                 Duh in an in `uan maw, hnahte no hninghniang.

            Van arfi tengtung le hnahchawl zat lo,                                                                                    Siing le za in an rel cawk hnga maw na van ralkap,                                                                       Vung chim hna maw Maikhel a mi rual cu.

            Kai-a-fas le a tlaangbawi rual hna cu ,                                                                                    Abraham le Issac fa Khamhtu kan hngak an ti tung,                                                                   An rut mitmu cu vun khoih laang ka tin zum hin.                     

            Thiang chin hmun an kai ah puan rang ti hna,                                                                        An fir khut le sualza an hleih pei an huh rua,                                                                                    Ka ning an zak langta le thlan rangrual.

            Ka zai ti lai lo Vanbawifa ka ta,                                                                                              Lunglawm a nem cu thachin vawlei ro na ti lo mei,                                                                     Cungchin Vankhua theih lo lem si hlah hna.

            Mah ti Mary Makadalin a lungfah le thinhun lio ahcun Jesuh cu a sifah a celh ti lo i, “Eloi,Eloi; Lema Sabakthani, ka Pathian zeicahdah na ka kal taak,” tiah a ai ruangmaang. Jesuh nganfah aihraam nih cun a orhlei mifirpa a ngaih a chiatter tuk i, “ Bawipa” tiah a vun zoh ahcun Jesuh nih,” A dih cang” a ti i a thi.

            Jesuh a thih caangka te cun, dutdet tiah khuadawm nak tlang pipi an hung zaam i, khua a mui chupmap. Cunglei in lul-lul-lul tiah khuari a tor. Lam nai tete ah `eek an tla. Puppep puppep tiah ruah fang ngan pipi a tla i hmakhat te ah kuang ti thlet in a vun i thle.~otho chimawk `ha lo a hrual in a vun i hrual . Lii aa hnin ciammam i, kum khua caang ti lo, lung vei tiatia, kurul-kurul tiah an caang i, vawlei tlerh in an ril. Mit`hep karah luti cu a vo in an i vo. Lei a min i, thing ngan pipi hoi hna an hram ningpi in tlaangpang ah an tolh zuahmah.Lii hnih ah thlaan `hing an kuai i luruh ro an mitkuak pipi  le an hani huh lo hoi hna luti nih a vun fenh hna. Khuamui lak ahcun thinghreu te bantuk `eek an kaap. Mimtlau a lek. Mah bantuk ruah le thli cu vawlei cungah a um bal lo. Van le vawlei an thin a hung. ~eek nih an tlaakmi paoh mal cikcek in an hmal hna. Thlitu a ai in an ai. Mi hna cu an ning a `i. Ai! an ti i, an zaam. Khua a muih dih caah lam kalnak an hmu lo.Pakhat le pakhat an i pah , an ril.Jesuh nu le a hawi le rual cu anmah te lawng an zaam taak hna. Vailamthing cu an hun naih i, Jesuh toi te ah an dir. 

  (Hrang Nawl `ialmi “KA ZAHPI  LO” lenhhloi chungin laakmi a si.)