Eng nawn zenzun in tlangkam ah liamzal aa relmi cerh lian nika zong hei cuanh ah liamsia herhmi ngei sehlaw a dawh dang. An ser zalam thluan hrawn ah an meiceu thep dilhdel tein tiva bang a luangmi mawtaw hna zong duhsah tein hmai lei tinhmi ngei an i tawn ziahmah.
Kan umnak Melbourne khuapi kam hna zong dai tein a um caah keimah lawng umhar ngai in khua ka ruat. A hlun ngai cangmi ka dairy cu tlapkhat hnu tlap khat ka van kau than. Cahang neh hmanh a tlau dih deng cangmi in catlang tawi te ka rak tialmi ka van rel than. .. ruah lo in a liamcia caan hna ka mithlam ah an hung cuang. Duhsah tein ka thawpi ka chuah, umm kum caan hna an liam manh hmanh ka theih lo kar ah thil sining tampi aa rak thleng mu " tiah keimah pi lawng bia kaa ruah.
Kiangkap hna cu daihnak nih a khuh dih caah king dimdiam tein an kulh hauhruanh kam ah zeiset tuah awk hngal lo in khuaza ka cuan. Ruah lo in ka lungthin ah philh khawh lo ding in a rak semmi um sehlaw cu bang in ka lung aa tuai tam.
Vampang ah a tthing ngai cangmi calendar ah ni thla ka van zoh cu 4 May thla a si. Aw hi ni celngel a si ruang ah maw ka thei lo mah ti ka lunglen hnga tiah keimah pi lawng bia ka ruah. A ziah hme hi ni cu ka philh khawh hnga lo? Um si hrim philh awk zong cu a rak tha hrim rua lo. Aw kha lio caan i ka kiang ah a rak thu tawnmi Minu te ka mithlam ah a hung cuang. Ngakchia tleirawl kan rak si caah pakhat le pakhat kan i zah, bia lung duh in kan i chim ngam lo nain lingthin chung in ruahnak kan i thei thiam ko timi cu kan pawngkam minung kan hawi le zong nih fiang tein an theih ko. Ka hna thlam ah ruah lo in a hung thang thanmi ka nau aw bia" U Malaysia ahcun kal duh hlah mu, na kal ahcun na ka philh ko lai " zei ti hlei in a leh zia ka rak thiam lo. A sinain kaa timh cangmi thulh than ding cu ka ruat kho lo. Nau a tu i ka kal ding cu hmailei kanmah pahnih caah nun nuamhnak ding caah lam ka rak sial chung si ko lai e" ka chim zong ah a duh lo a lu aa lei. Tlangkam in a zammi meithang hna phen in a liam dengmang cangmi nika cu thep lo in kan cuanti. Thal a si caah khuaza cuanh zawn ah lungthin aa phun dang. Faiceu hna le vaurawng hna nih an i dawhnak par en chuah in khuapau cu an lawm ve.
Thinghnah hlun cu an til i zalam cung ah thlitu nih a choih lemni hna ka hei hmuh. Kan pahnih bia kan chim kho lo. Bia chim kaa timh ah ka dang a ka kharh, ka hna thlam bantuk in ttah ik thawng bantuk ka van theih tlawmpal ah ka tangnem cung ah dai tein aa thlim nute ka thiam tawk in hnemh kaa zuam. Duhnak nih thuk tuk in hram a rak thlak cangmi kan pahnih kar i tian lai ding ruah ah nun khua a mui. Zanthlapa toi ah holh lo in khua kan cuanti. Cung firuk runrual hna cu a bu tete in an thep dilhmalh. Cuanh zawn ah an i dawh tuk hringhran hna.
" U na ka kal tak lai ding hi na ruah sirem ko maw?
Bia leh awk hngal lo in a bia ka ngeih piak.
Zantlai hnu ah anfadawt zuunthing tuar in a hrammi Fiakfai hramthawng cu kan thlang thinghual chung in khingriangmang tein kan hei theih. A chel caan ah khualu boa lei in a hung boami Uico awnh au zong an dai riahmah ve cang. Zantlai zilthli bel nih lungthin a daihter kho lo. Fim dildel tein mitmu lai fang i a dilmmi sian lonak mithli phen in zanthlapa vang cu kan pahnih holh lo in kan cuan ti. Zan a tlai chin lengmang cang. Tiannak ding caan a nai chin lengmang.
" ka nau na ba tuk ve cang, kei zong thaizing cu tuan tein kal kan hauh cang caah tin cang usih mu"
ka chimmi bia a ka let lo nain din tein a lu a khun. Duh sah tein kan kut zanem tlaihmi cu kan van i then riangmang. "Nangmah kal hmasa mu U" din tein a chimmi bia nih ka lungthin a sual sal.
"Nau nangmah kal hmasa" lampi ah sau nawn kan dirti than. Hnu lei veve i her bu in kar khat hnu kar khat in zaang uai chialmal in riahruun kan panh veve. Zan khuadei ih merem lo in khuaza ka ruat. Zinglei fingrei cah lai zawn ah ar a hungkhuang sin ka ruahnak le ka thinlung cu thangh hram ka van i thok.
Keimah thlah ding in a rami chungkhat hna le hawikom van zoh ah sian lonak mithli a luang. Chuahsemnak lungrawn le khua chuah hau hnar cu hnu lei chit bu in tlaungchin rama h tianzai ser in hnu lei ka chit tak raingmang. A sinain lungkil in ka hlammi le ka kawl len mi nau nau bel a bau ai cang. Lungsia herh bu in tian zai kan ser. Zeitik tal ahkhin ton than caan khi um te hnga maw? ton caan um aikun sempuak he tlangkhuna dim cang lai mu ti ruat bu zanmang lei ah ka hunglan riangmang. ……
Tlerlung
Melbourne
Comments
Post a Comment