Man Bo le Than Cer

http://miyzone.blogspot.com.au/2011/11/mafa-2011-exhibition-vanapa-hall.html chung i ka lami asi.

Nu va an um i fanu pakhat an ngei.  A min ah Than Cer a si.  Lo ah an kal tawn.  Lo in an hung tlun ah a pa nih Than Cer cu meiluah a fial.  Than Cer cu an innpa nuhmeinu inn ah a va kal.  “Ka pi, mei kan luak,” tiah a hei ti.  “Na pa he kan I um lo ahcun,” tiah a hun ti.  Than Cer cu a pa sinah a vat li i, “Na pa he kan i um lo ahcun a ti,” tiah a pa cu a chimh.  “Kan I um ko lai, a ti, tiah vung ti ko,” tiah a ti.  A va kal ṭhan i, “Kan i um lai a ti,” tiah a va chimh hnuah mei cu a hun luahter.  Zanriah ei khawh in nuhmeinu le a fanu Man Bo cu an thilri he an hung i pong.  Than Cer pa nih cun zei ti tuah awk a hngal ve lo i a nupi ah aa tuah ve ko.

Nikhat cu Than Cer nu le pa cu tiva ah an kal.  Nga an tlaihmi paoh cu, “Than Cer caah,” tiah a ti lengmang.  A vapa nih a ing kho cawk ti lo i, “Nga tlaihmi paoh Than Cer ca ti lengmang,” tiah namtong in tuk a zalh.  Cu hnu ah cun a nupi cu ti chungah lo ko a pil i lim ah ai cang.

Than Cer cu a nu-ei nih a huat tuk i rian hrang lawngte a ṭuanter hleiah tuksop cangngal lawngte a eiter.  Man Bo tu cu a dawt tuk i rianṭuan loin rawl thawthaw lawngte a pek.  Cu tikah cun Than Cer cu a rawl ṭam le a re theih a celh lo i tiva ah a kal tawn i, “Ka nu, ka nu,” tiah a ṭap tawn.  A ṭah thawng a hun theih cun a nu cu a hung chuak i rawl thawthaw a pek tawn.  Man Bo nu nih cun Than Cer hi khuazei rawl dah a ei hnga, hi tluk thau liaarluar in a um.  Na fanu rawl a petu hi  na thah lo ahcun ka kal lai, tiah a vapa cu a ti.

Ni khat cu Than Cer kalnak cu a pa nih a thlite in a zulh.  Tiva kam i a nu i rawl a pekmi cu a hmuh.  A thaizing ah a pa nih Than Cer cu tiva ah a kalpi, “Than Cer na auh tawn au,” tiah a ti.  “Ka pa, zeihmanh ka au bal lo,” tiah a hun ti.  “Au ko, na auh lo ahcun kan thah lai,” tiah a namtong in a dir awnh.  Zei ti awk a hngal lo i, “Ka nu, ka nu, ka pa nih,” a hun ti ah, “Ṭha tein au, thah maw na duh,” tiah a nam har in tuk a hun timh.  “Ka nu, ka nu rung chuak,” tiah ngaihchiate in a nu cu a hun auh.  Limpi cu tikam ah a hung chuah vial ah khin nam in tan thum ah a chuah.

Inn ah a sa cu a phurh dih i Than Cer an chumhter.  “Ka nu, na zei hmin cang,” tiah Than Cer nih a hal.  “Ka fa, ka ke hmin cang,” tiah a hun ti.  “Ka nu, na zei hmin cang,” tiah a hun ti ṭhan.  “Ka fa, ka paw hmin cang,” tiah a nu nih cun a hun ti.  “Ka nu, na zei hmin cang cang,” tiah a hun ti ṭhan.  “Ka fa, ka lu hmin cang.  Khan, ka sa maw hun ei lai ci, ka ruh vialte hi hun khawm dih law tiva kamah hun phum te.  Ni thumnak ni ah changvut dil sarih he hun veng te,” tiah a chimhtak.

“Sa a hmin cang,” tiah a chimh hna i rawl an ei.  Than Cer cu a ruh lawng te an phawt.  Than Cer nih cun a ruh lak i a tit tlawm tete a ummi cu a khoih i inntang awng ah a thlak didh.  Arkhongpa nih, “Tiktididi, Than Cer nih satit hlumpi a ka thlak i thaw hngin,” tiah a ti.  A pa nih, “Than Cer, zeicadah satit hlum cu kawmtang ah na thlak,” tiah thinkamang in a hun ti.  “Ai, ka thla nemman lo, arkhong cu a lih a si ko cu,” tiah a hun ti.  Rawl an khim dih cun a ruh vialte cu a khawmh dih i tiva kamah a phum.  Ni thumnak ni ah changvut dil sarih he a va ven tikah ṭhihlawn, saka, ngun lawngka, ṭhirual, ngun kuthrolh ah ai cang dih.

Than Cer nih cun ṭhihlawn cu ai venh tawn.  Man Bo nih a hlan tikah a sianh lo.  Man Bo nu nih Than Cer cu, “Na nau hlan ve,” tiah a kingh a vuak.  Cu tikah Man Bo nih cun ai hlan vet awn.  Asinain Man Bo i ai venh ah cun leitlak ah ai cang dih i ai dawh lo.  Than Cer i ai venh tu ah cun ai dawh ṭhan ṭhiamṭhiam.

An khua pawng khua ramuk bawi fapa A Lal nih Than Cer cu ṭhit dingin a hal.  Asinain a nu-ei le a pa nih Man Bo cu Than Cert hum in an thuamh i A Lal sinah kalter dingin an timh.  “Kei cu va ka ngei lai; a duh nih ṭhim kiak sio kiak hung ka ṭhen u,” tiah a au i khua lakah Man Bo cu ai chok uar.  Than Cer cu Man Bo thlahtu ah an kalter.  An khua an phak laiah Than Cer nih Man Bo cu, “Nangmah maw an ṭhitmi na si,” tiah a ti i a thilhlawn hlanhmi cu a lak dih, a kingh a vuak i Man Bo cu an khua leiah a ṭah buin a kir.  Man Bo nu le pa cu an thinhun ti awk a ṭha lo.  Than Cer cu kan thah lo ah maw kan duh hnga, tiah a cer in an i cer.

“Than Cer kha e a pa a thi e hung tlung she law,” tiah an hlen i bia an cah.  Tisa khap kua in an sat.  Than  Cer cu a pa ruak humh ah a hung tlung.  Kawmtang ah a nu-ei nih thil char a fial.  Kawmtang a luh lioah titlok in an toih i a thi.  A hnuk um an hleh i huaka thingkung cungah an thali.  Man Bo cu Than Cer thuam in an thumh i A Lal sinah an kalter.  A Lal le a sale nih cun Than Cer a si lo, ti an hngal ko nain zei ti awk hngalh lo ah an umter ve ko.  A Lal nih, “Than Cer, thiam va tak,” tiah a ti.  Thiamtah cu a thiam lo nain ai awh ve i, “purh suk purh suk” tiah a ti i thiamtleng cu a hei khawn tlurtler.

Than Cer hnuk-um cu langakpa nih a lak i a bu ah a zuanpi.  A camh i Than Cer cu a nung ṭhan.  Langak pa nih a fa a umter.  Langakpa cu rawl hawl ah a kal tawn.  Than Cer cu langakpa fa ai puak i nau hla a awi tawn.

A hlanah cun, a hlanah cun A Lal nupi k arak si;
Atu ah cun ka pu langakpa fa ka um lio,

Tiah hla a sa tawn.

 

NI khat cu A Lal salle pawl ramlak ah an vah lioah a hlasakmi cu pakhatpa te nih a hun theih.  “Aih, ka duale, ngai tuah hmanh u, cu hlasakmi cu ,” tiah a hawile cu a ti hna.

A hlanah cun, a hlanah cun A Lal nupi k arak si;  atu ah cun ka pu langakpa fa ka um lio;

tiah a hlasak cu an hun theih ṭhan.  Rianrang in an bawipa cu an chimh.  A salle cu, “Rianrang in vung la u,” tiah a ti hna i an va kal hnawh.  Langakpa umnak thinking cungah cun an hei zoh I, “Ka pu langakpa, kan pi kan hung la,” tiah an hei ti.  Langakpa nih cun, “Hnapkhar keuku khat, meihawl tlangrel khat nan hun put ahcun na lak ko lai,” tiah a hun ti hna.

A salle rual cu inn ah an kir i khuapi hnap kher an khoih i keuku khat le meihawl tlangrel khat cu an phurh.  Langakpa cu an pek i Than Cer cu inn ah an tlunpi.

A Lal le a salle rual nih, “Nihin cu Than Cer le Man Bo an i tu lai,” tiah an ti i buh thawthaw le sa thawthaw an eiter hna.  Arti an dinh hna.  Man Bo cu thilchia hru an hrukter.  Thing nam an puter.  Than Cer cu thilthuam ṭhaṭha an thuamh.  A chah khawh chungin puanbu an aih chih.  Nam har zirziar an putter.  “Man Bo ka tu ka tu, chawlkung,” tiah Than Cer nih a hun ti.  Man Bo nih cun a hun tuk len nain thing nam nih cun a tei naisai lo i a zei a poi lo.  Than Cer ka tu, ka tu, tlam suai,” tiah Man Bo nih a hun ti.  Than Cer nih cun tlam suaimai in a hun tuk.  Man Bo cu A Lal salle nih a sa an can i umpu chungah an thutter.  A thut pah dengah khin a salle nih a nule sinah an phurh.

“Man Bo vapa nih sathu an kuat hna,” tiah inn chungah an ṭhumh i A Lal salle cu an khua ah an kir ṭhan.  A Lal nih a inn hlei pelh dingin a tuah i uitum a tangah a hren.

Man Bo nu le pa cu umpu kau an i ngaih ngang.  Man Bo nu nih umpu cu a hunk au i sathu cu a hun suah i rawl he an i meh.  A hun suah ṭhan i kutdong a hun hmuh.  “Man Bo kutpi ko dah a lawh,” tiah a nu nih a hun ti.  “A, ei ko, zei Man Bo kut va si hlah,” tiah a vapa nih savo tuhpah in a hun ti.  A hun suah ṭhan i a kedong a hun chuah.  “Man Bo kepi kp dah a lawh,” tiah a hun ti ṭhan.  “A, hnasen tla loin, hna na chet, ei ko, zei Men Bo kepi dah a si lai,” tiah a va pa nih cun a hun rak len.  A hnu bik ah a lupi cu a hun chuah i Man Bo lupi cu a si ko.  “Ka fanu Man Bo pei a si ko hi; Man Bo an thah ko hi teh,” tiah an thin hun in an i hram sek i, an ṭap an ai.  An nuva in A Lal te khua leiah cun hnawhchih namcahm in an kal.  A Lal salle nih khua pawng in an rak bawh i Man Bo pa cu li le cantiang in ril ko an kah.  Man Bo nu cu A Lal inn leiah a tli uahmah i hlei a hun kai.  Hlei nih cun a pelhpi i a tla.  Cu ah cun uitum nih a rak she i ai tiau sek len.  A ruak zong phum loin hau lengah an hlonh.  Than Cer le a vapa cu nuam tein an um i bawite an bawi, khuang an cawi.