THIHLUNG HMAPE

A caan cu zarhpi ni zanlei suimilam 3.30 PM hrawng a si.  Zarhpini hi Malaysia um laimi kan I ton cemnak cu CCF hi a si. Mah le riantuannak cio ah um a si tikah hawikom he I ton zong a har ngai a caan I phone chonh le massage I kuat deuh in ttan Iak cio a si tawn.  CCF pumhchuah kaa tein lai dawr lei ah an kal cio hna I Sabuti a ei na, rawl ei na an si hna .
Chan Hniang dawr le Ngun Mang dawr cun Fiakfairok dawr hi Imbi ah a um le, cu kaa ahcun laimi hi kan khat peng.  Cu lio ah pa Chan Lian zong pumh chuah sabuti ei dingin ai thawh ve nain mi an khat tuk I a awlok a chong. A mit a veih len lio ah dawr a ken fiak teah cabuai pakhat a hung I minu a mah te lawng a thut khi a hei hmuh. Khua a ruat I ai laklawh mi ko khi a lo. Pasal tiphun in tthutnak lei cu a hei fuh. Thinphang pah nawn , aw thirnawn in ka far hi ka hin mi a tthu mi an um maw? Nungak nu te nih hmai panh tein a um lo aw" rak thu ko tiah a hei chonh. Chan lian cu umtu awk hngal set loin a um Sabuti puaitan ai cah I a ei pah buin a mitsir tein minu lak phak din lio cu a thli tein a hei zoh tawn. Pa  deuh kan ti  cu a mah nih theih ternak a van I tuah hmasa.   Minu te nih lunglawm hmai panh tein "kei ka min cu Iang Hnem ka si ka phanhnak a sau rih lo ka u le sin ah ka um.  I tuhi Times Square ah rian ka ttuan nak thlathum hrawng a si " tein aw-kaa nem tung a piang tung mi tein a van chim mi nih pa lian(Chan Lian ) thinlung ah hmun a rak khuar manh cang rua.  Hnem Ku biachim aw dai tein a ngeih piak a kaa a an a caan ah a mit duhsah tein a tthep pah tawn ngangtor in a zoh.

Iang ku hi Malaysia a phanh nak kumkhat fai a si I a riantuan nakah a hlawh tling kho tuk ve lo. Voikhat sungai Buluh lei ah Restaurant (rawldawr ) ah an ttuan le an pu nih thlahlawh a pe hna lo. Lungdongh in KL lei a kir I Times Square ah a hawi le nih an luh kaa te a si ve. Cu lawng lo in Malaysia I tleih khih tamnak lak I nu a mah lawng khuasak le lungretheinak le harnak ah a ho van ban ning ti awk van um lonak ram ah khuasak cu a chaihma ve hrim ko. A u nu hi Zing Len a si I fa-sem hla fa-sem he inn ah a um peng ve. Cun a caan ah a Unu Pasal hi Asenci (Wisky le Thaisong) a tong pah tawn I chungkhar ah buainak a chuahpi lengmang tawn.  Hnem ku cu a u le sin a um ko nain a mithmai ah lawmhnak tak a leng kho lo ti cu  palh awk ttha loin a mithmai nih a langhter tawn ttheu. Tanghra a awn ka  in a nu le nih an van rat termi a si. Khuami le a thei hngal paoh nih zaangram lo an um lo. Hitluk Hnem Ku a dawhmi ngai te Malaysia thawng pang chia lak I lungrethei tuk I va um ko lai ngai cu an ti cio. Hnem Ku cu duhnak timi zong hi a ruat bal lo.  A ca-cawn le inn le hnohnai a zohnak ah a caan a dih tawn ko. Cun a pa hi church Pastor a si le mikip nih an lengngam tuk lo mi a si. Nain kan ram ahcun nu le pa chim lo mah pawcawmnak hmanh a har caah hi ka ram a vun phaknak zong hi a si ve.
I Palian he cun bia an I ruah I theih lo kar ah an van I ngamhtlak colh. An biaruah a thaw deuh rua suimilam kal caan zong an thei ti lo. Tlawmpal ah Hnem Ku nih lau nawn in
 “ ai... rianttuan kal za kan I tong kai lawm tuk Pa Lian kan I ton cu” a van ti. Pa lian nih tihduk ngamh duk in “ Hnem Ku zangfah tein na ph numbers na ka pe kho hnga maw?”
 Hnem Ku “ umm...”  a van I ruat ta. ok a ngah ko e a number cu a van chimh  si
“ ka lawm tuk ku Hnem Ku Bye...” an I ti I inn lei ah Palian cu a ttin colh ve.
Palian thinlung chungah Hnem Ku lawngte a ruat cang. A caan ahcun ngangtor in a rianttuannak hna a um tawn I a hawi le nih ka dua khua  ruahnak ahma na rat  sawt rawh hih tiah an capo tawn. A caan ah message an I kua tawn. Kum le caan an liam bangin an pahnih kar ah I tleihchan nak mei alh bang a hung alh chin lengmang.  Hnem Ku a rian tuan dinh caan ah PaLian nih a Boss pa sinah khawnh hal cu a rian nganbik ah ai ruah ve cang. An I tontawn nak cu a hmasa I Chan Hniang dawr kha an thim, an pahnih hna tla in. Lakphakti an dingtti a caan ah Movies an zoh a caan ah pangpar dum ah nuam tein an kal ti tawn. I an hmur kaa in kan dawt ti cu an chim lo nain an thinglung cun an I veng veve.  Voikhat cu zan lei sang ninu liam a ser cang mah lio ahcun pangpar dumdawh ngai mi ah va bangin tlengkhat ah tthu in biasawmza an rel. An thlang tlang lawng pi cu duhsah tein a khualtlawn lam a peh. Ttuanzai a rel mirun rual hna zong run inn panh lawi hram an I thok hna cang. Mi ramdang ah thingphan nak le lilen nak in a khat ko nain dawtmi he lenah mah vialte a te nau tuk. Zei hmah nih a pheng kho hna lo. Zanlei ninu liam caan a ser I zilthli kik te a van I hei diamai I Hnem Ku sam cu thli nih duhdah tein a van hran I a zihmui rim nih thinglung tiang a khenh cikek. Palian nih thep loin a zoh a hmur pum te le mitmu hrim cu zohcim lo in khua dang hawi tak sian ding zongin ai tiah lo.
Pa lian nih Hnem Ku cu a kut nem tein a vun tleih I ,a aw lak ah nembik le a bia lakah a thlum bik mi ,in
“ Hnem Ku na ka daw maw? Kei cu nikhat hmuh lo hmanh ah ka um kho ti lo. Kan hlam zungzal ka pawng te ahhin um zungzal law kei caah Saduhthah a tling ko hnga” tiah pa cancuh in a van chimmi bia nih Hnem Ku a umtu a van dan ter. Hnem Ku nih sau nawn let loin a van um tang lei a zoh a a kam a seh I khua tampi a ruat.  A Voikhat nak a thinglung chungah a cami le a ven pengmi a si fawn tung.  Aw ka nem tein
“ ka tta kei cu mu duhmi zong hi ka nei bal lo, cun pa pawl hi cu nuamnak men ah mi komh nan hmang tuk I ...tafar bantuk in kan um ko lai mu”  tiah a tawi fiannak in a van leh. Palian a umtu a van I remh,
“ Hnem Ku veimu pazong cu na chim bangin an um tak ko nain kan I khat hna lo ti zong hi na theih ko cu ta.  I kei cu nangmah hi ka voikhat duhmi zong na si ve I kei caah na thinlung inn ka na ka onh kho hnga maw?” Tiah aw carua chuah bu tein a duhnak cu a van langhter tthan. Hnem Ku nih holh tuk lem lo in a lu te a suk I aw din nawn in “ka tta kan dawt tuk ve ko. Darling dang ka ngeih tak hlah mu kei zong na caah zumh tlak tein um ka zuam zungzal lai”  tiah Hnem Ku aw cu Pa lian hnaa chung I a hung luh cu a hnar ah siapi ai tlum men lai ti awk in. Dawtmi he vawlei I caan hman cu a nuam an ti ve hrim ko.
 
I Voikhat cu Hnem Ku Holiday a la I PaLian he nidang bang an leng tti than.  Cu lio ah ruah loin PaLian hmurka in bia a hungchuak mi Hnem Ku nih a ruah bal lomi a si tikah a awlok a chong.  “ Hnem Ku na ka dawtak ahcun  napar tizu ka caah a thlum al kho ve hnga maw?”
“ Pa lian ka hngakchia tuk rih cun mah I na ka halmi cu a si kho lo,  ruah loin naupawi ning law zeitin a si kho lo” tiah a bia a van peh. Lai phungthluk ah a um mi cu "Thingtum leh long nu leh lawng" an ti bangin a dongh mawrawt ahcun Hnem Ku nih a par ennak cu zamlei ninu liammi sinah a uaiter ve ko cang. Thlathum hrawng a ruah ah PaLian cu a riantuannak ah I manh lo ngai a hawj le pawl rian a chim hna.  A busy I a lunga tuai peng zan ah canhlei (overtimes) 10:30 PM tiang an ttuan tawn. Mah tluk a lungretheih I a um lio ah message tlang li ye a tialmi Hnem Ku sin in a hung ra ko. Huam ual huam lo ual in a van zoh,
“ ka ta PaLian na riantuan a tlamtling maw? kan ngai tuk cang e, nai hrawng cu ka dam lo ka luakchuak rawl ka duh lo I rian zong ka ttuan kho lo i mah kong hi chimh lai cu ka ttih tuk nain chim lo awk atha lo ka ruat thiam ko mu. Nizan ah sikhan ah kai piah le Sayama nu nih Nau na cuang thlathum a si cang a ka ti.” Palian a lung buai cang a sinain pasal a tuahmi cungah fek tein a dir ngam ve I thit-um thlacamnak in an tuah I Hnem Ku he nuam ngai in tling khan cungah khua an sa. A sinain an caah thawngchia pakhat a hung thang mi cu Pa Lian te kha US lei kal dingah thawng an van thanh hna.  Hnem Ku te nufa cu CRC  card lawng an I tleih I cun pa lian le Hnem Ku caah a har bikmi cu hihi a si Pa Lian nih an chungkhar in a benh dih hna. An chungkhar zate 7 bak an si a nau le hi an hngakchia ngai rih hna nain a nu le pa bel a tar pah cang. A lungretheinak nih zan hngilh kho loin a um hi a tlawm ve lo. Nupi le fa hna kal tak lai a ruah ah a thawpit. Khat lei ah an chungkhar kong a van ruatthan nufa hna hngilhnganh ruah ah kal lo um ahcun a nau le le a nu le pa kumzei can dah a mah ruangah hren rih hna lai ti a ruah ko ah a lung a van tuai chin.

 A pa nih
“ Kafa kha hihi a si ko rawh le kei le na nu nih zaibia kan chim kho lo, nang cu fa upa na si cun na bia el kan In tim lo, a si nain nufa hna cu kan kal hnu ah teh laknak ding kan zuam ko hna lai. Nangmah nawl a si ko” 

 tiah a van ti Palian zong cu a pa bia ngai I ngang tor in a zoh ko. I Hnem Ku “ ka tta Pa Lian va kal ko na sia kan herh duh hlah, a hnu ah na kan lak te ko lai cu” tiah a van chim I PaLian cu mifa naupa nufa hna kaltak lai sian lo ah a ttap thluahmah be ko. A mawh ve hrim lo. I caan cu tleihawk tha loin a mah tein a liam lengmang bang Pa Lian te kal laj ni a hung phan cang. I Hnem Ku zong nau a pawi than I cu lio I mah te lawng van hmei ding cu a fawi ve hrim lo.  UN zung hmai ahcun nufa hna cu ar totio tein an dir ko. Pa lian nih a fapa te cu “ Henry papa daw maw” tiah a van hal um dawt a van ti aa bua ... tiah a van ti a fapa te nih a pa biangki te cu a van hmanh.  Henry nih kapa khaw zei kal lak tizong a thei rih lo I a hnu bik kan I ton zong a si lai tizong a ruat bal lai lo.  Hnem Ku zong cu pavuah fa tein a mithli a van I hnawh len I Pa Lian nau le tete nih U U kan in ngai tuk lai kan in siang lo hung tuan uh mu U Hnem tiah an ttah len.
Pa Lian nu nih Hnem Ku te nufa van kaltak lai cu a siang lo tuk ve hna I
  “ hi tluk ka tupa ka chor lio mi vam I tthen lai ding cu ka ruat kho lo e,  maw vawlei nan nufa in dam tein kan sin phakter nak dingah pathian sinah thla kan cam hna lai mu” tiah a van ti hna.
  PaLian nih Hnem Ku cu a biang cung mithli fim tete cu a van hnawh hna I
“ka dawt dam tein kan I tong tthan hna lai mu tiah a van hnemh” .
“Um..”
 UN zung hmai I mithlah mivial te nih an zoh hna ah an mithli in an rak tuar pi tuk ve hna. Hi ka hmun ahin laimi milu zeizat hme ai then cang hna I mithli tla in kan tian cang hna. Ai daw cukmak mi zong zei hngal loin an kan then ko. Kut ka congtu pawl nih zeithei an van then hna I sian lo mithli rualriat he nufa hna cu hnu an chit tak riangmang hna.
I Hnem Ku te nufa cu inn khan fate an hlang I cuka ahcun an hmei ve. A  paw cu a ngan ngai I a rethei ngai ko nain Tuluk rawldawr ah Kheng tawl ai hlawh I cu ti te cun an nufa in khua an sa. Tlawmpal ah naute a van nei I nute a si a pi nih Iang Hlei tiin a sak. Pa Lian zong cu a lawm tuk ve a Phaisa zong tluang tein a kuat tawn hna. Voikhat cu PaLian nu nih Hnem Ku a van chonh I a nu a holh kho tuk lo a dang a kharh.

“ Ka fa veimu na ngeihchia hrim hlah mu kan mah kan um ko PaLian nih in kal tak hmah hna seh nan nufa in zohkhenh cu ka rian a si” van ti. Pa lian hi mifel te a si ko nain US an phak tlawmpal ah rianttuan le mahcun an innpa he an rianttuannak ai khat I nu mawttaw cu a zul lengmang tawn. Mah nu cu kum 28 hrawng a si caan sau deuh an van I zulh doi cun an karah duhnak nih hmun hma a rak khuar I a mah nak kum 6 upa deuh mi he an I umh nak cu a si. Nu nih I zalh tak ahcun zeitluk in lungpi bang ka biakam fek lai a ti mi zongset pho inn sa bang an pur ruangmang tawn ve ko rua. A lang tlang in cun I duhdawt timi a har ngai ve tikah khat leiah soisel thlu awk zong a si ve lo.
Cuticun Hnen Ku te nufa cu Malaysia ahcun nuhmei dir hmun in an um cang. Tuluk rawldawr ah rian a ttuan I a fale cu CWO sianginn ah a kai ter hna. Zankhat cu Hmen Ku ai hngilh kho loin zeidek ruat sehlaw a lo . A ho dek hlammi a ngei rua cu lio ahcun Pa Lian sin ah hitin ca a tial.  Ka Dawt bikmi PaLian dam in na um maw?  Kan nih zong kan dam lio te a si ko e. Hngakchia zong an tlei ngai ko nain e pa vanhai tein an nun ka zoh hna ah ka celh hrim lo e.  Nunu… papa khoi ah um an ka ti ahin a leh awk ka hngal hna lo I a thli tein ka mithli hi ka hnawh tawn e. Nang cu na kan duh ti lo I pei na kan kal tak cang cu zei ti ttha mu. A sinain kei cu e hlan I kan biakam cu kei na farnu nih cun fek tein ka tleih ko. Ka fa le pa ei he chanpi lai cu ka ruat kho ti lo e. Na hliam takmi thinlung hmape bel cu lei hmun tiangin a hmun cang lai. Damh khawh ti lo mi zawtnak bang kei nih ka van tuar rih lai. Aw Pa Lian zeiti ttha mu na tum lengnu he duh cuai in khandal cungah rung leng kon u mu. Khah hngakchia ihpi an hau lr mangtha tuk kun ne umu na far Hnem Ku.

 1/7/2014
Tler lung ( Sang Lian Thawng)