*Laksawng Sung Bik*

 

 Suingun si lo, par dawh si lo
Tangka si lo, thingttian si lo
Cerlian si lo, thlatangpa zong

Siseh a hluan, hi lei cung ah
Aa lawm biktu, kei cawl voikhat
Mit chinh siang lo, kei daih tiang in
Thlanti cuak in, ttuanrel ka nu
Duh sum cikcek, kei or vuainak
Voihnih ruat lo, kei tthatnak ca'h
Ruah a hmu lo, ni a liam lo
Chunzan ti lo, kei fimnak ca'h
Cung fidi bang, zungzal hnemtu
Mah ca ruat lo, kei theng caah

Sung khun ka ti, lei cung ah hin
Ka chim thiam lo, kei ka tuarnak
Aanbia a tlawm, a phuangtu ding

Na ttangnem ah, daihnak ka ton
Na mit chung ah, kei lamhmuhtu
Ka tlau diam hnga, nang tel lo cun
Thla na ka pek, zuan na ka chimh
Ka der caan ah, thazaang hrawmtu
Ka tlau ttheo tawn, siseh na tthawng
Kei lam hruai ding, na thachia lo
Ka bia a car, na ka ngaihthiam
Zungzal cerhti, na ka hmuhpiak
Hi leng nun ding, hram na ka pek

Hawi ka hngar lo, nang na um cun
Thil dawh zoh in, cuai ka thlai lo
Kei ca’h na za, nunnak hmunhma

Zeizong na tuah, kei ca theng ah
Cerlian na hluan, fidi na lonh
A thuk bik in, a sang bik tiang
A ka hlerhtu, a ka bawmtu
Ralttha ngai in, kei hmaikaltu
A bau hrim lo, nang na reikiang
Zeizong vialte, tling khirhkherh in
Ka samfa in, ka ke dil tiang
A dihlak in, nangmah ruang ah
Kei ka tlamtling, sunghno ka nu

Ka herh ti lo, ka tum hlei lo
Ka duh ti lo, ka cuan hlei lo
A sung bik ko, nang na dawtnak