Thisen Mithli

Miphun le ram zalennak duh ruang ah maw chungkhar cingla le thikhat sempi komhawi rual hna hnu ah chit in ram ca ah maw lu nan hlo. Hlanchan pipu nih an thim ramnuam kan Chin ram kawl pennak ah kan tlak hnu naungan fak bang a hrum ai. Kum 60 renglo ramchung thong kan tla. Mah khengchung savo hmanh maw pur ngam lo in an kan tuahto. Kan sakhnem ruun toi ah ra in duh paoh in an tlonglor hna. Cuchin chap ah Chinmi cu milu tlawm kan si a nung Pathian bia kan si ruang ah kawlchia hru nih nehsawh thlanglamh in le an lungdiriamnak men ah an kan hman. Kan mifim thiam sang ngeicheih chun hmanh an ser manzu in hlo dih kan tim hna maw? Ruah ah lungthin a chunh tuk.

Cu vialte kan ral hna kan Chinram in thawldoi tu ding ah pei kaw kan Chin Nusal tha Pasal tha nih hacang rial in miphun caah rian an tuan. Keitial sa bang ramlak tuhmawng toi ah lilen umhar le ram zuun ngai in nihluan thla kum zeizat ko khi dah an caan tha liam cang mu.  Mihrin fa ve lo bang tamhal tuar le surhan thlu lo in kan Chinram ah dothlennak an tuah. Hlanchan kan miphun midei hlan ahcun cangvaihnak a tam thangchiatnak  atam. Kan miphun ca dothlennak tuahtu hna an hramnak aw kan theih lo. An tamhal nak kan theih lo. Mipi cung ah a caan ahcun kut zong cu an thlak theu ko lai ta a ruang cu ramkhel dothlennak tuah tikah kan mah lawng hlah Kawlram um tlangpar mi hna an temtuarnak hi van ruah piak ve hna ahcun zai ngam ding kan rak si lo dahkaw mu.
Tlangval thisa thawng le mifimthiam sang rual hna lung put nikhat hnu nikhat a hungkarhcho ciahmah ve ko cang. Lai nu hmanh pei kaw ramzalennak caah hriamhrei tlai in dothlennak cu tuah hna e. Harnak le temtuarnak phun kip tuar kan CNF/A hna hi van tuak ve ahcun kanmah bang ramzalennak hmun nuam ah duhcuai in an tlongleng kho ve ko dahkaw. Fimnak catang sang kai an duh ve ko dahkaw mu. Nu le pa unau rual hawikom hna he len ti cu an cim hrim lai lo. Hmanhseh kan Chin mipi zalennak caah tiin teirialnak ah an tuanmi rian hi upat an tlak tuk hringhran. Hawidawt cheukhat hna nu le pa tangnam hmanh ah pom manh lo in an nun a pam mu. Hawi he hmanh umti lo in le ramsa bang in thinghawmg toi ah mah te lawng lileng thlavai kiang in ciamsermi hawidawt hna mithlam ah nan cuang hringhran. Ram nan dawtnak nan thinlung le nan ruahnak cu zungzal a hmun lan cang lai. Thangthar seino hna siangcung ah ai khinhmi kan rian lungrual tein kan tuan ahcun teinak thanthar cu kan Chinram khualipi Cungrung ah kan thlaican khi a phan te ko lai.
Sung hno a nu cu e
Fadawt zuun tlem len lai mu
Ho zadomh tu ngei lo in
Tluangchin ah maw nan liam fah cu
Leikili tiang a cul dih e
Lungthin a chunh
Kuttum rengh le hacang rial in
Nan hawidawt nih kan rak tuar cio
Nan tuan ramca dothlennak cu
Theipar chuak manh lo in
Liamlung sia herh ve lai mu
Nan rau thla in e
Van cuan rih u law kan chinram te nih
An in hlam riangmang hna lai
Hmahseh….

Nini khat cu cungkhua ramnuam ah
Hmuhton um iakon
Nuam in kan leng ti te hna lai
Bia le hla zong nih a tlinh kho lo. Khuaruah zawn ah dang a kharh lungthin a kekkuai . Kan ram kong ruah ah a fiangmi cu chim caan si ti lo I a tak in tuan caan a cu cang ti hi  asi. Ram caah nunnak tiang pe nusal tha pasal tha hna lungthul hrim hlah uh. Khuadei dengmang cang. Lungkop khat in hmai ah kan nor hna ti lai.

Sang Lian Thawng@Tlerlung
Melbourne