Na Tlei Tuantuk E

Rose Mary Tial Neih Sung

Nizan cu ka riantuannak ah caan then kan i din. Lalpan ah ka phone va van lak i " Vawleicung cu duhtlin lonak ram pei a si cu mangtha tuk mu U Mary" a hmanthlak ka van zoh than cu Panhte in kan rak i chawn i hawikom tha ngai kan rak simi Canada um Rose Mary Sung a si cu ka van i fiang. A tanglei comment cu pakhat hnu pakhat ka van kau ka rel duahmah. A rau lo midang timeline in an sian lonak tete an vam tialmi ka hmuh than rih caah chun nitlak tuan nuam lo in ka um. cikhat cu holh lo in khua sau nawn ka ruat ta.
Ka thinlung chung ah pakhat hnu pakhat in a biafang ka van ruat than.  Aw mi lungtluang le lungthin thiang, duh nung te Mary na kal tak ko cang mu" ti hlei chim zia ka thiam lo.
Zinglei suimilam 10:00 AM a si cang. Ka catlap le bag he Pastor bang in Imbi ah khua meeting kai ding Maluri in kaa thawh. Ka pawtam deuh caah Imbi Chan Hniang Dawr ah ka thu. Voidang i ka hmuh bal lomi ngakno muisam a keng deng nain a mui cu ngakchia te a lo, a michonh biak a tha i theih bal lomi zong awka thlumte le pangzar tein a chonhmi hna ka hmuh tikah ka lung a ka lak ngai. Lakphak ti hrai khat a ka serpiak i ka meeting tuahnak kong ah ka buai. Caan tlawmpal ah Kei Australia ka rak phan i khoika a um zong ka thei ti lo. Nikhat cu Facebook ka tuai i ruah lo in hmanthlak pakhat ka van hmuh i " like" ka hei pek. Ka vanzoh deuh cu ka hmuh balmi a lo ngai caah sau nawn ka zoh. A samtawi i a mit cu tial riaria tein a hnarthlung hna cu aa dawhtawk tein  a sam i a sam cu a hngawng phan deuh lo tiang in aa tan. A timeline in ka van zulh doi i Malaysia ka rak hmuhmi nute kha a si ko.
"Hi" na dam tha maw Mary?
Mary " aw ka dam tha hi nangta"
Aw ka dam ziah tu hi khoi dah na phak cang?
Mary " Canada ah pei kan hnu kum ahkhan ka phak cu "
Aw si maw tha tuk hna ngam si cu"  caan rau lo ah kan bia a cat.
A liamcia 2015 August thla laitlang puicimh ton lio ahkhan ruah lo in a hmanthlak te cu ka hmuh than. Salai Bawi Hrin nih a van "Share " mi a si. Canada lei in Bu pakhat nih Rose Mary ca i Donation tuahnak an sermi web a si. Ka zoh i ka lau tuk.  Kaa zumh lo a ca ka rel than a mah a si ko. Laimi le an mah mirang zong a pemi tete an tam ngai.  A Facebook in ka hei chonh.
" Helo na dam tha maw?
Mary " aw ka dam tha ko hi (a ngan fahnak kong kaa khat hmanh a chim lo)
'"Nau nai cu na thawngpang ka theih i ka lungtha lo tuk e"
Mary " um sihrim ko e , nain mu mikip hawimom dawtu tete hna nan mah bomhnak le thlacampiaknak thawng in ka dam tuk cang"
"A tu hi ta Sizung ah maw na um ko"
Mary" si lo kan tin cang i inn ah ka um ko e. Umhar tuk le hi TV hna ka zoh ko"
"Ummm na zohmi ka theih bak lo? (A nih pah buin umm si Korea zatlan si ko hih)
Suimilam pahnih chung deng kan i chawn. E nau vei mu " aw chim ko zeitin? Tiah a van ka ti.
Lenhloi chuah ka duh i mah kha na hmanthlak te kha a phaw cuanter awk ah na ka pe siang hnga maw?
Mary" aih keimah hna tar ding cu kai dawh lo pi he" capo ah kan lut.
Aw si thingkung tangte i na zaubu naa thlakmi kha?
Mary " aw mah kha maw na duh rak hmang te ko mu, ( a bia peh ) kan sianginn kainak hnu lei ah si le keimah lawng ka umhar tuk lio ah kai thlakmi a si" Nau naa rem tuk na cute tuk eh"
Umm kaa lawm tuk mi rem lo zong ah nang hi cu mi fak na thiam tuk le eish.... kan pahnih in kan mirhti.
Mah hnu cun kan i chawn bia kho ti lo. Sizung ah ka um kai a ti tiang lawng kan i chawn. A sinain hlami ngei ning law cu bang ka nun lileng. A mah kong rumro ka ruat. Mah lio ah tu thil kan vanton cu ihzan mang chia a hluan.
Dear Mary

Mah hi capar na sin  ka van tial ahcun na mipum incun na rak rel kho ti lai lo ti zong kaa fiang ko nain na rauthla in cun na rak rel in na theih thiam ko lai dah tiah ruahchannak ka ngei.  May 1 ,2016 ni kha cu philh awk a tha ti lai lo , hi ni thla hi chungkhar ca le hawikom ca ahcun ngeichiatnak chumdi aa zelhni a si . Nang na ca bel ahcun nganfah tuanrnak le lung lilennak , vawlei nih a chuahpimi temtuarnak in na luatni a si caah na lomhnak bikni a tlanni a si. Aw ta kan minung sinak cun kan celh ve hrim lo > lei kili na hninh I na kong a theihmi paoh nih an indawtnak le an ngaihchiatnak an langhtermi zong na rak hmuh cun na rak I lom ve ko lai tiah ruahchannak ka ngei fawn.

Mithmuh lo khuachin tluang dang ah nun lileng in le nganfahnak phun kip nih an temtawn lio hmanh ah a mithmai a panh zungzal khomi Mary a tu hnu na kong, na sining ka ruah than tikah Pathian nih an dawtuk ti zong fiang tein ka theih caah kam khat lei in cun ka hna ngam. Kan rak i chonh lio thi deng in  kan rak ni ti, bia nuam kan sai. Ngamfahnak le lunglen tuar lo khi bang na rak hluan. Na aanthlum hna hna thlam ah an hungcuang than. Nganfahnak le temhnak na tuarmi hmanh hrum ai lo te dai tein naa in khawh. Na lungthin nih teiko hmansehlaw na titsa bel cu duhsah in a tumchuk ti ka hmuh tikah hmur ka in chim khawh lomi lungthin kekkuai nak nih ka nuna zelh. Na U le he nuamte hmanh in lencim hlan le chungkhar cingla ruahchannak,  tthikhat sempi hna an van na hai riangmang ve lai mu. Malaysia in Canada lei na kal ni na hawikom rual hna a langtlang in zuun ngaihnak nan phai bia le hla nih milung a zur khun.
Nganfahnak le tem in nih a temtawnmi pumsa hna cu na thlarau chuahtak a si cang. Kan minung sinak incun tuar a har, sian na um lo tuk hringhran , hmanseh nang cu na rian aa lim cang. Lilennak le nganfahnak vialte na kal tak cang. Sui in hutmi vanku ka hram in Dawttu Bawipa nih lunglom tein a za an chanh cang. A tangnem toi ah dai tein naa din cang lai. Hi vawlei ram nun maw van ngai lai cih mu. Na liamlung siaherh hrimhrim hlah. Mary nang cu mikomh nuam,  milungthiang na si i na kalnak kip ah dawtu na ngei. Hi vawlei khualtlawnnak in na kal ni ah kan timi hawikom, kan miphun in si hna seh, ramkip minung he nan i hmu hna lai mu. A sinain nan lam bel aa dang hna lai. Ih zanmang tal ah zungzal hmun nuam na palnak cu rauthla tal in van kan chim ve law e, ....
Hi lei ram ahcun hringnun tonthan caan um ti lo hmanhsehlaw cungkhua ramnaum tu ah zungzalin kan lengti te hna lai. mary mah hi capar hin na kut kan tlaih I kei nih na caah tuah khawhmi ka ngei lo. ka lung a tha lotuk mi pakhat bel cu na hmanthlak cauk phawcuang na sin ah kuat ding kan timi na kut cung phak manhmi lo cung ah ka ngaithiam hram ko law.  Mah hi capar hi a donghnak bik na kut zanem tlaih caan ah ka van tialmi si dam te tuin vungkal ko kun ai ne law,,,,,

lei ah tahnak
van ah mih nak

lei ram hramnak
van ah lomhnak

Lei cu chiat serhmi
Van cu thluahchuah ram

Hi ram chuah tak in
Van lei ah na kal cang


Vanram tu in
Kan dong te mu

Mang kun law,
chiatserhmi vawlei ram cu
na liamlugn sia herh hlah mu....


Tlerlung
Melbourne
05/04/2016