Minung le saram Kan i Dannak 

Salai Van Lian Thang 

Minung le saram kan idannak pakhat cu minung cu nunphung kan ngei––ulh le amhmi, rai thawimi le bolsanmi, zumhmi le biakmi, sunhmi le lawihmi kan ngei.

Buddhist nih Gautama Buddha chuahnak Lumbini (Nepal), ceunak a hmuhnak Bodh Gaya (India) le phungchim thawknak Sarnath (India) cu hmunthiang ah an ruah i, an sunhsak ngai. Kawlram uktu Than Shwe (2010); President Thein Sein (2011) President Htin Kyaw (2016) nih India an tlawnah hi hmun hi va biak loin an kir hna lo. An sunhsak ngai hna.

Hindu an hmunthiang cu Varanasi khuapi (India) asi ve i tiva thiang ah an ruahmi Ganga tiva kamah a um. Cu tiva ah i hnim cu "sualthiannak" ah an ruah. Pipu chanah lainawng nih Leitak Siapanglai tikhor kut an purh cun an sual a thiang, tiah an zumh ve.

Varanasi khuapi zong an sunhsak tuk ve caah cu khuapi aiawhtu MP sicu an duh tuk i Narendara Modi le tulio a lar ngaimi AAP Chief Arvind Kejriwal zong thimnak ah an va kal i cu khuaah an vai cuh. India nih "spiritual capital of India" "holy city of India" an ti i an sunhsak ngaite.

Muslim nih Muhammad a chuahnak Mecca khua (Saudi Arabia) cu an hmunthiang an ruah ve i an sunhsak ngai ve. Abraham fapa Ishmael dirhmi asi, an ti. Muslim poah nih an chankhat ah voikhat tal cu Mecca tlawn dingah an cathiang Guran nih a fial. Muslim puai Ramada ah relcawk lo nih kakip in an fuh. Mi an tamtuk caah an thih pah theo. Hi khuapi lei hoih in khup an bil in, nikhat ah voinga thla an cam.

Pakhatte ka tenhta.

"Hakha" hi Acozah nih Chinram khualipi a ser ruang longah khua biapi asi lo. Lairam khua tampi lakah Siangbawite nih "Mission Station" ah an rak thim. Siasal a bia i, muihnak tang um Chinram kha hi hmun in an rak ceuter. Hi khuaah an lu an iphum. Tiddim Siangbawi zong Tiddim ah siloin Hakha ah aa phum. Cucaah Hakha hi Chinmi Khrihfa caah thlarau leiin sunhsak awk (sacred city) asi ve ko. Tucan cun Siangbawite thlan hna khi aa dawh khawh chung tamh a tha ngaite; Aizawl lam vialte bantuk khin.

Judahmi le Khrihfami nih Israel ram cu ramthiang (Holy Land) le Jerusalem cu khuathiang ti asi ve. Islam zong nih an sunhlawih ko. Muhammad a phan bal ve, an ti.

Tuthla hi Khrihfami caah a thlum thla, kan Bawipa chuah thla asi. Bethlehem khua cu tu lioah West Bank town (Palestine) leiah a um. Khrihfami caah hmunthiang (sacred place) asi. Jerusalem in 102 Km aa hlat. Milu 25,000 an um. Cheuthum cheukhat long Khrihfa an um cang i, Muslim deuh an si.

Nain, Christmas can cun vawlei kakip in khual singkhat leng nih an fuh. Tulio te hi a sunlawibik caan te kha asi. Dawtnak, remnak le daihnak um ko seh, timi bia hun iphorh in vawlei ka kipin an panh cio. Place of Peace and Power ti zongin an ruah caah Khrihfa asilomi zong nih an sunhsak tuk.

Bethlehem khua muisam nih daihnak, remnak le tangdor nun a langhter e, an kan ti. Cucu Christmas lungput asi e, an kan ti. Cu lungput in kan dong hnik hna lai.

Ka hun religious tuk maw? A poi lo :D

Nan zate,

Merry Christmas!