Bangladesh Kan Kalnak Ka Dairy (Ramca Nunnak Petu Hna Tuanbia )

2/17/2014

 Henry Mang 

Oct 7, 1995 kum ah Sgt. Rokhawm he Aizawl in GOC lei ah kan kal. GOC cu October ni 8 ah kan phan. October ni 8 hi ka birthday ni a si. 1988 kum i tlaih an rak ka thimh lio hi October 7 a si. October ni 8 hi kan ram ka rak chuah tak ni a si. Oct 8 ka chuahcam (Birthday) paoh paoh hi ka tlik cang a si rua. 2001, Iron Rod operation lio zong ah Champhai palik Vaphai ah an rak ra. October 7 kha kan umnak ramtang cun Vaphai ah ka rak kai. Mah ni ah tlaih ding in an rak ka ti i kan tlunnak kan tupa Robert ni ka pu Palik nih tlaih ding ah an in kawl a ti. Vaphai cun Farkawn lei ah ka rak tli. A thaizing Farkawn in Vaphai ah ka ra i Palik nih tlaih ding ah an ka dawi than. Cu ni cu October ni 8 a si. Ka birthday paoh paoh hi ka tlik ni an si i cu caah a cung lei ka rak tlik nak pawl ka fianh ta bia a si. Midang cu an Birthday ni hi nuam tein an hmang natein kei ka Birthday cu nuam te le phanbu in ka tli peng ve.

GOC tang ah Commander Sgt. Biak Lawm hruaimi Southern command ah Novembe  ni 12 tiang kan cam. November ni 13 in Bangladesh lei ah kei mah, Lian Awi, Ram Sang he tiin kan kal. Kaladan khuapawng india lei kam ah hin Khumi pawl an um. Mah khua chung ah hin ALP le AA pawl hi an um. Southern Command in kan rak i thawh i Tisih va lei ah kan rak tum. Tisih lei kam hi a caan ahcun India si lo le Kawl hi an rak phan pah tawn. Tisih va in Khuapai lei ah kan kal. Khuapai in Laki lei ah kan kal. Laki hi India camp umnak a si. Chun ahcun kal ngam a si lo. A ruang cu an camp tang hi lam a si i chun ah kan kal a si ahcun check peng a si. Laki in orh lei kam kankal ahcun Kawlram lei Para khua ah kan phan. A si natein Para lei ah kawl ralkap an um caah Laki khua tang cu zan ah phiat i kal kan i tim. Ram tang ahcun kan um i khua muih hlan lo tiang kan hngak. Khuamuih hnu in an camp tang cu kan kal i Lungpuk ah riah ding cun kan i tim kan kal. Mei kan vang ngam lo. Mui lak ahcun kan kal. Lam hi a muih tuk caah lamthlang te hna kan tla pah. Kan thawng an kan theih i mei in an kan ceuh ah hin kan bawk. Mei an thial ah kan tho i kan tli. An camp tang kan lawnh in cun a thlanglei ah mei cu kan i van i Lungpuk khua cu zing lei pa 1 hrawng ah kan phak. Lungpuk ahcun zankhat kan riak i a thaizing ah Kaladan lei cun kan kal. Kaladan hi chun ah cun kan lut ngam lo caah zan ah kan lut. Kaladan hi November 14 ni ah kan phan. 15 le 16 ni hi Kaladan ahcun kan i din. Ni 17 ni zan ah Bangladesh in a rak kai mi kan hawi le he kan i tong i Kaladan in khat lei ral kawlram lei side ah kan lut. Mah zan cu kan hawi le a rak kai mi hna he kan riak ti. A thaizing ah minung pahnih kha GOC lei ahcun Ramsang te he an kai. Kei mah, Ye Ma, Aung Yoh le Ngun Mang tiin Bangladesh ram lei ahcun kal kan i tim. Kei mah kha an rak ka don pah. 18 ni zing ahcun Kaladan in Ramritlang lei ah kan kai lai kan ti i kan kal. Kan chak ah mi an rak ra i mah lam ahhin kai hlah uh. Kawl nih ambush an in tuah hna an ti. Mah le cangka cun kan zuang i tiva hmete ah kan kai i kawl nih ambush an kan tuah nak tlang cu kan hrial. Ambush tuahnak tlang kan lonh bak a chak tlang par kan phak lai ah Ambush a rak tuah mi pawl ralkap kha kan chak ah an rak i din. Kan i thup i an mah pawl an kal hlanlio tiang kan um. Mah pawl an zuan dih cun kan nih zong cu lam dang in kan zuang ve i Kaletchoung kam ah kan riak. Kaletchoung hi India le Kawl nih fur ahcun boat in an duty, thal ah ambush an hngah tawn. Khuadei hlan ah kan chuah khawh lo a si ahcun ni a ceu hnu cun tih a nung. Zinglei pa 4 cun kan i thawh i Kaletchoung cu kan va tla kan ti cu kan tlaknak kha kan i palh i kan pil. Ti cu kan van i lio i tlawmpal ah kan chuak. Khuadei hlan ahcun kan cin dik. A kik tuk. Paletwah ram cu ram chia a si. Malaria a tam. Khuasik zing ahcun a kik tuk, Chun ahcun a lin tuk hoi, Kan phak zan cu dap hi ruah ti bantuk in a sur, Kan puan pakhat cu dapti nih a tlak tuk caah a rit tuk i kan kal tak. Tiva kan tan dih cun tiva cek pakhat chung ah kan lut i kan kai. Lo ah kan va luh lai te ah hin ramlak zil kan hmuh i meh ding caah kei le Aung Yoh nih kan lak pah, Ye Ma le Ngun Mang cu rawl rak chuang chung ding in kan kai ter hna. Mah lo ahcun kan GSO Pa Do te groups he i ton ding a si. An nih hi khual an rak tlawng ve. Lo taw in rawl an chuan nak thlam hi minute pa 5 hrawng kai a si. Ramlak zil ka ei sual ruang ah ka tha a ka hmeh i ka buhri, ka kai kho ti lo. Mah minute pa 5 kai mi lo cu minute 30 deng ka rau. Thlam chung kan phak cun rawl cu an rak hminh dih cang. Meh chuan ding cu kan pek i meh cu tisa so mi ah an paih i an chuan. Cite an thlak i anthor le mai an hnah an thlak i a hmin in kan ei. Ei dih in a chak thlam ah kan i thial i GSO Pa Do te cu kan hngak hna. Pehthan rih ding