Catialtu: Henry2/17/2014
GOC tang ah Commander Sgt. Biak Lawm hruaimi Southern command ah Novembe ni 12 tiang kan cam. November ni 13 in Bangladesh lei ah kei mah, Lian Awi, Ram Sang he tiin kan kal. Kaladan khuapawng india lei kam ah hin Khumi pawl an um. Mah khua chung ah hin ALP le AA pawl hi an um. Southern Command in kan rak i thawh i Tisih va lei ah kan rak tum. Tisih lei kam hi a caan ahcun India si lo le Kawl hi an rak phan pah tawn. Tisih va in Khuapai lei ah kan kal. Khuapai in Laki lei ah kan kal. Laki hi India camp umnak a si. Chun ahcun kal ngam a si lo. A ruang cu an camp tang hi lam a si i chun ah kan kal a si ahcun check peng a si. Laki in orh lei kam kankal ahcun Kawlram lei Para khua ah kan phan. A si natein Para lei ah kawl ralkap an um caah Laki khua tang cu zan ah phiat i kal kan i tim. Ram tang ahcun kan um i khua muih hlan lo tiang kan hngak. Khuamuih hnu in an camp tang cu kan kal i Lungpuk ah riah ding cun kan i tim kan kal. Mei kan vang ngam lo. Mui lak ahcun kan kal. Lam hi a muih tuk caah lamthlang te hna kan tla pah. Kan thawng an kan theih i mei in an kan ceuh ah hin kan bawk. Mei an thial ah kan tho i kan tli. An camp tang kan lawnh in cun a thlanglei ah mei cu kan i van i Lungpuk khua cu zing lei pa 1 hrawng ah kan phak. Lungpuk ahcun zankhat kan riak i a thaizing ah Kaladan lei cun kan kal. Kaladan hi chun ah cun kan lut ngam lo caah zan ah kan lut. Kaladan hi November 14 ni ah kan phan. 15 le 16 ni hi Kaladan ahcun kan i din. Ni 17 ni zan ah Bangladesh in a rak kai mi kan hawi le he kan i tong i Kaladan in khat lei ral kawlram lei side ah kan lut. Mah zan cu kan hawi le a rak kai mi hna he kan riak ti. A thaizing ah minung pahnih kha GOC lei ahcun Ramsang te he an kai. Kei mah, Ye Ma, Aung Yoh le Ngun Mang tiin Bangladesh ram lei ahcun kal kan i tim. Kei mah kha an rak ka don pah. 18 ni zing ahcun Kaladan in Ramritlang lei ah kan kai lai kan ti i kan kal. Kan chak ah mi an rak ra i mah lam ahhin kai hlah uh. Kawl nih ambush an in tuah hna an ti. Mah le cangka cun kan zuang i tiva hmete ah kan kai i kawl nih ambush an kan tuah nak tlang cu kan hrial. Ambush tuahnak tlang kan lonh bak a chak tlang par kan phak lai ah Ambush a rak tuah mi pawl ralkap kha kan chak ah an rak i din. Kan i thup i an mah pawl an kal hlanlio tiang kan um. Mah pawl an zuan dih cun kan nih zong cu lam dang in kan zuang ve i Kaletchoung kam ah kan riak. Kaletchoung hi India le Kawl nih fur ahcun boat in an duty, thal ah ambush an hngah tawn. Khuadei hlan ah kan chuah khawh lo a si ahcun ni a ceu hnu cun tih a nung. Zinglei pa 4 cun kan i thawh i Kaletchoung cu kan va tla kan ti cu kan tlaknak kha kan i palh i kan pil. Ti cu kan van i lio i tlawmpal ah kan chuak. Khuadei hlan ahcun kan cin dik. A kik tuk. Paletwah ram cu ram chia a si. Malaria a tam. Khuasik zing ahcun a kik tuk, Chun ahcun a lin tuk hoi, Kan phak zan cu dap hi ruah ti bantuk in a sur, Kan puan pakhat cu dapti nih a tlak tuk caah a rit tuk i kan kal tak. Tiva kan tan dih cun tiva cek pakhat chung ah kan lut i kan kai. Lo ah kan va luh lai te ah hin ramlak zil kan hmuh i meh ding caah kei le Aung Yoh nih kan lak pah, Ye Ma le Ngun Mang cu rawl rak chuang chung ding in kan kai ter hna. Mah lo ahcun kan GSO Pa Do te groups he i ton ding a si. An nih hi khual an rak tlawng ve. Lo taw in rawl an chuan nak thlam hi minute pa 5 hrawng kai a si. Ramlak zil ka ei sual ruang ah ka tha a ka hmeh i ka buhri, ka kai kho ti lo. Mah minute pa 5 kai mi lo cu minute 30 deng ka rau. Thlam chung kan phak cun rawl cu an rak hminh dih cang. Meh chuan ding cu kan pek i meh cu tisa so mi ah an paih i an chuan. Cite an thlak i anthor le mai an hnah an thlak i a hmin in kan ei. Ei dih in a chak thlam ah kan i thial i GSO Pa Do te cu kan hngak hna. Pehthan rih ding
Zanlei pa 4 hrawng ahcun GSO Pado le a nau le pa 8 cu an rak phan. Zan 5:30 pm ah ar va cawk ding cun Pa Sian, Ko Bi le kei mah tiin kan kal i kan va cawk. Kan riah nak in nazi cheu kal ah kan va cawk. Zan pa 7 pm hrawng ahcun kan riah nak cu kan phan. Kan nau le nih cun ar cu an thah i a thaizing zing ka ei ding caah cun an chumh. Mah zan cu ruah a sur ngai. A thaizing zingka thawh i arsa ei lai cu kan i ngaih ngai. Thaithawh cu nuam tein kan ei hna. Ei dih cun kan riah nak hi kan i thial ah a tha lai kan ti i Nov ni 20 ni ah cun hmun dang ah kan i thial. Zan ah bia cu kan i ruah hna i GSO Pa Do nih hi ka lei lam hi na thei ma a ka ti. Ka thei lo ka ti. Ye Ma cu ka hal i a hrial nak ding cu ka theih ko lai a ti. A thaizing Nov 21 zingka 8am ahcun kan riah nak buk cun kan chuak hna i tlang ahcun kan kai. An nih kha a dang in khual tlawng ding an si. Kan riah nak le ACP camp kha nazi pa 1 kal hrawng a si. ACP cu AA in a chuak mi an si. ACP cu kawl CID pa nih a rak hruai mi hna phu an si. GSO Pa Do nih an camp kha nan hrial lai i mah nan hrialdih hin cun tiva ah nan zuang lai i nan luat ko lai a ti. Zing pa 9:30 am ah kan i then hna i kan nih cu Bangladesh lei ahcun kan kal hnik. ACP (Arakan Communist Party) camp cu a tlang in kan bih i mau lak in cun kan hrial. Tiva kan tla i kan luat cang ti ah kan i nuam ngai. Nazi 1 leng kan kal hnu ah kan hmai ah hriamtlai pakhat kha Yema nih a hmuh. Yema kha point ah ka kal ter. A ruang cu experience a ngei bik a si. Kawl ralkap zong a rak tuan bal mi a si i kan safe kho bik lai ti mi ruah nak in ka ti. Mah kan i ton hlan te ah a chak tisor tang ah kan i din ta. Kan tan mi ti kha kan zuan nak in a thlang lei ah a luang mi ti a si caah kan ti tan mi kha a nawi i mah cu cu sa ma an si hnga si lo ah minung dah an si hnga ti in rak hlat ding ah a kai mi a si. An camp ral kan phak lio ah hin ka lung a hring ngai mi cu an camp hmai ah minung pakhat hmanh ka hmu hna lo. Ka lung cu a tha lo ngai. Ka tih a si ahcun an tih ve lai ti ah ka phan caah ka lung chung cun thla ka cam len. Kan i dinh nak in kan tho i minute pa 10 tluk kan kal ahcun mah pa cu kan hmuh i a tli. Yema nih ral a ti. Mah le cang ka cun an kan kah colh ko. Kan hmuh mi kha kan mai lei lawng a si i kan hmai lei ahcun kan kah cio dih. Kei kha diltlang ah kaa benh i ka zoh hnalio ahcun kuan kha ka sir lei a rat kha ka hmuh. Kuan nih a ka khen nak ding ah hin zung 2 te lawng aa duh. Ka orh lei hna pawng ah (Shu) a ti. Ral kan i kah ahcun kuan thawng hi ving-ving-ving a ti ahcun an kan kah mi hi a sang ti ah theih khawh a si. (shu-shu-shu tiin kan theih a si ahcun an kan kah nak hi aa naih i kuan a tlak mi hi aa naih tuk ti ah theih khawh a si. Back uh ka ti i kan back. Yema kha rak kir ka ti. Ngun Mang le kha kah piak ka ti i kei le Aung Yoh cu kan back i thing luang tang ahcun kan bawk i kan kah piak hna. Mah ahcun kan hnu lei cun an rak kan kah cuah mah ko. Tlang lei kan kai lai tiahcun a thi dih ding kan si. Mah tlawmpal an rak kir cun kan back than. Ka ruah mi cu a tu kan i kah mi hi ambush bak a si cang. Ral nih pei an kan kulh dih cang ko hi ka ti. Back uh ka ti hna i kan back cuah mah. Tisor pawng kan phak in kai uh ka ti hna i kei le Yema kha a hnu deuh ah kan tang. An kai i a liam ah kei ka kai ve. Tipum kakhat te an khan mi a si i a nal ngai. Ka kai i ka keden a nal tuk caah tisor chung ahcun ka tla. Ka keng kaa khawn. Thi cu a chuak ngai. Kaa lio i ka chuak. Cun Duhsah tein cun ka kai. Ka kai dih cun Yema cu ka auh i a rak kai. Kan kai dih bak khin kan tisor tlang cu Kuanpi in an rak kah. Kan i thup manh cang. Kan i kah chung hi nazi cheu leng a si. Mah ti cun mau karlak ah kan i thup pah bu cun kan kai cuahmah. Lo i kan hmuh mi hna khumi pawl kha pakhat hmanh kan hmu ti hna lo. Mah ti cun kan riahnak lei tlang ah kan kai i kan va kir. Pa Do le a nau le nih kan i khah thawng kha an theih i kan mah bawmh ding ah an rak ra. A si natein kan keneh kha kan hmuh i a luat mi a um i kan kawl lai an ti i kawl ding ahcun an rak i thawh. Kan riah nak hmun kam cu kan hrial i ram lak ahcun kan kal. Mau tang ahcun kan ni din. Kan i kah ning kha kan chim i Yema nih ziah a hnu lei in nan kan kah a ti. Kan in kap lo kei mah kha diltlang ah ka bawk i kan auh lio ah khan ka sir lei in an ka kah i ka hna pawng ah kuan a ra ka ti. Cun thing luang tang ah kan bawh lio ah khan kan hnu lei in an kan kah ve ka ti. Mah kan i kah nak ruang ah ka hna orh lei hi ni 2 chung bia an chim mi ka thei lo. Thawng a thang deuh mi ka theih ahcun ka hna hin thi a chuak. Ka thin phang ngai. Ka hna pei a rawk cang ko hi ka ti. A si natein sii kaa thuh i caan sau nawn hnu ahcun a tha than. Khua kan cuanh i tlang dongh nak lei ah minung pa 4 hrawng kan hmuh hna. Zei dah an si hnga kan ti i mah pawl va pel ding cun a tlang cu kan zawh.
Mah tlang kan zawh lio ahcun a tlang thluan hi hlan lio kawl nih Burma Communist Party pawl a rak doh hna lio ah a bawhnak khur pawl hi a tlang thluan ah a tam pi. Mah tlang kan va chuah lai ahhin minung kan hmuh mi hna hi meithal aa tlaih mi an si. A si na tein a ho te an si kan thei lo. A tlang kan chuah i kan va zoh hna ahcun an rak um ti lo. Mah kan zoh dih hnu hna in kan riah nak hmun lei ahcun kan rak kir than. Kan riah nak thlam cu kan lut ngam rih lo. Mei zong kau ngam lo cun kan um ko. Mui lai hrawng ah kan hawi le cu "Chin Pasaltha" timi ralkap hla an rak i sak i an rak tum ko. Kan i nuam tuk i kan au. GSO Pa Do nih cun a ho ho dah nan um an kan ti i kan za tein kan um ko. Kan him dih ko kan ti. Kan mah hi Nov 22 ni ah a hnu bik nan rak phan lai ti ah an kan ti. Mah lio chan ahcun date line kan lonh a si ahcun fung in voi 10 tuk a si. Nov 21 ni kha i kap hlah uh sih law 22 ni ah kan phan kho hrim hrim ding khi a si. Ka ruah ah fung tuk ding cu ka rak tih ngai. Mah zan cu GSO Pa Do nih cun teinak nan hmuh caah kan lawm piak hna lai a ti i ui kan cawk i kan thah. Mah zan lei mui lai te ah khan kuanpi(Mekpi) hi voi 2 an kah thawng kan theih. Zan riah cu kan ei dih cun kan nau le kha riah an i tim. Mah ahcun kan thawh ter hna i tiva cek te cun kan zulh. Lungpang kan phan i zan ahcun a tum har tuk lai caah riak uhsih kan ti i kan riak. Hmun cu a cheng caah mau kung kha kan i lamh pah hna i mah ti cun kan it cio hna. A thaizing zingka ah minung pahnih an rak ra i nan van tha tuk tuzing zing lei pa 5 hrawng ah nan riah nak thlam kha minung pa 20 leng an rak ra i an rak kulh. Nan mei ceu mi an hmu lo i an kir than an ti. Lungpang cun kan zuang i a hmu rem nak ah thaithawh cu kan chuang. Thaithawh ei dih cun tiva kha kan zawh than i lam nazi 1 leng kan tlau. Maulak ahcun kan kai i a tlang pi cu kan zawh. Cun tiva lei ah kan zuang than i tiva chak lei kam ah minute 15 hrawng kan i din. Paletwah ram cu tiva a tam tuk i a tlau fawi tuk. An ti va zuan ning hi aa khat dih fawn. Tiva kam cu kan zawh cuahmah i chak lei kan zawh lai kan ti ahcun ralkap keneh bak hi tawr lak kan hmunh. An lam nak ti hmanh a nawi rih. Mah le cang ka in tlanglei ah cun kan zawh i a pahnih nak tiva te lei ahcun kan kai than. Mah kan kai i thlam kan phak bak ah thlam ngei tu hna nih a tu nai minute 5 hrawng bak ahkhan ACP minung pa 20 leng an rak ra i nan kong an kan hal i an ra lo kan ti hna. A si ahcun kan rat mi kong rak chim hlah uh an kan ti i kan bawh hna lai an in ti hna. Cu caah kan lo tawh hin zuang than u law mah tiva hi chak lei pi tiang va kai uh. Cu lo cun nanni kap sual lai an ti i an chim bang cun kan zuang than i kan rak kai nak tiva in a chak lei ah kan kai. Zan pa 7 hrawng ah kan hawi le facang a phur mi Corp. Biak Ling le a nau le umnak ah kan phan. A thaizing cu ka nau le he cun camp lei ah kir ding kan si i kan mah pa 4 te lawng cu kan i thawh. Camp kai nak tlang kan phak hlan ah hin kan mah hlan te ah 2lt. Nun Cung le a nau le an rak i kap. Mah an i kah nak kan kai lai ah hin ruah lo pi ah AA pawl kan hmuh hna i kan i kap deng hoi. AA,ALP le CNF cu alliance kan tuah caah i kap lo ding in kan ti i kan i kah lo nak cu a si. Camp tlang kan kai i kan camp lei ahcun kan lut. Camp kan phak in camp in-charge sin ah inform kan pek. Camp in-charge nih cun Maj. Zing Cung sin ah report a va pek i an kan auh. Kan kal i GSO Pa Do nih ca an kan tial piak mi cu kan pek hna. Ca an rel dih in cun kan i kah ning kong an kant hal i kan chimh hna. An kan leh mi cu Pathian nih an um pi hna. Ambush chung i nan luh i nan chuah khawh mi hi Pathian nih an ven hrim hrim hna an kan ti. Cun ambush chung i a lut mi chung in a nung i a rak chuak ti mi hi kan thei tuk bal hna lo. Hma an pu a si lo ah an thi. A tu nan nih cu nan luat Pathian nih an um pi hna caah kan i lawm an ti i fung voi 10 tuk nak ding in kan luat. Camp kan phak cun ka thawpi zong fak lak in ka dawp ka chuah khawh ve cang. Mah kan va phak cu URF pawl training an kai lio a si i an training cu practical in field an lut i camp ah camp lak ning kong kha an cawn ter hna. Kan phak a thaizan cu a si kaw Maj. Zing Cung le Camp in-charge sin lawng ah thawng an thanh i kan nih ralkap sin cun an kan chim ti lo. Zing lei pa 1 hrawng ah camp lak ning cu an cawn i bomb (caku bomb) kha an puah. Van ah meithal an puah i camp chung ahcun an tli, an au. Kan i kah ka te cu a si ve fawn caah ka lau tuk caah duty laknak post ahcun ka tli i kaa thup. Kan hawi pa cu a lau tuk i Kadohcin kan cawh mi chung ah a lut. Mah hlan ah hin ruah a sur i ti kha khup tiang hrawng aa dil. Kan mah le kan rem nak cio cun kan i thup. A hnu ah URF pawl an si timi thawng kan theih cu kan thin hung tuk. Kan hawi pa cu a cin dih i a zai nak ah hin midang cu kan zai kho ti lo. An kan zai kenh dih. Kan thil pawl cu an thur/hnawm dih i a thaizing khua dei ahcun zai pah cun kan suk hna. Mah lio ah mikhual pahnih kan ngeih hna i mah mikhual pahnih hna cu mah ti i URF nih camp lak ning an cawn lio ahcun tlik nak an thei ti lo i ihkhun tang ah an i thup an ti. Mah ahcun kan pa a si mi nih a tih tuk caah ihkhun tang cun thla a cam len an ti. An hawi pa nih cun na aw thang tuk a ti i dai ko mi thlacam lio ah hna chet hlah a ti. Cun a thlacam mi chung ah a telh mi cu zei hme kan can ka pa lam ah voikhat, a tu ah voikhat lung retheih nak nan kan pek a ti an ti.
Comments
Post a Comment