Carelnak ( Lungfim chimtu cabia tha taktak a si)

(Joel Ling `ialmi LUNGPUT chungin laakmi a si.)

Carel hi mino caah `hiang`hunh bantuk a si. Mino cu khua kan hmuh khawhmi a tlawm, thuukpi le kaupi i kan ruah khawhmi zong a tlawm rih. Kan caah a herhmi le a `hami he pehtlai in sianginn le biakinn deuh lawng hi kan cawnnak a si tikah, mino herhmi dihlak hi cu hna pahnih lawng hin cun a tling lo men lai. Cucaah, carel hi kan hriamnaam pakhat bantukin kan ruah a hau. M. Div. a simi siangngakchia nih a herhmi thiamnak le fimnak hi M. Div. saya/sayamahte  lawngin a za lo tinak a si. Cucaah carel hi kan nunlam a tluantertu a haartertu a rak si.

Atu kan ram ca cawnning ruangah mi tampi cu ca cawn huam lo le lungtho lo kan um len. Sianginn kan cawnmi in zei ngai kan i laak lo tiin kan vuivai tawn. Hi chan lio ko ahhin a leengca tampi rel khawh, mahte in fimthiamnak i kawl a herh khun. Cuti aa kawl khomi le aa zuammi caah cun kan chan le kan cawnning a chiatmi nih chiatnak a pe hlei hna lo.

Carel tikah ca`ialtu pakhat lawng kha uar i cu ca`ialmi lawng rel timi hi a `ha lo ngaimi a si. Mikip nih an `ialmi kan rel lawngah mikip thinlung le ruahnak tem khawh a si.Mikip ruahning le hmuhning kan teh deuh tikah kan lungput a tluang deuh, kan ruahning a kau deuh. Kanmah le kan duh deuhmi le kan uar deuhmi phun cu a um ko lai. Asinain, kanmah uarmi lawng kha a hmaan bik le a `ha bikah ruah lo ding hi a biapi ngai. Midang uarmi le hmuhning kha kan uar khawh lo zongah huat lo a hau.

Cuti midang sining le khuaruahning tampi kan i hrawm khawh, kan tem khawh vemi kha carelnak nih a kan peekmi thluachuah a si. Midang tampi sining kan hmuh tikah kan khuaruah a kauhter, kan lungput a tluanter, kan mit a auter, kan ke a fehter. Khuahmu mi cu mitcaw nakcun hlen an har deuh ko lai. Ruahnak pial zong an i harh deuh ko lai.

Cauk `ha dangdang von chim lo, tadinca le journal tepawl kan relnak hmanhin, thil tampi a kan chimhmi, a kan chaptermi a um len. Crimes journal kan rel thawngin mi an i hlenning, mi`halo pawl cawlcangh tawnning a kan chimh. Cu nih cun ralrinnak le hrial khawhnak a kan peek.  Sports Journal kan rel thawngin lakphakti dawr i lentecelh kong ceih tikah mi bia kan i hrawm kho, a dik loning i an chimmi zong kha a dik lo ti kan hngalh khawh. Theology kong kan rel deuh le theology kong ceihnak ah siseh, Pathian kan hmuhning, kan biakning he pehtlai in khuaruahnak ah siseh bawmtu a si ve ko lai.

Carel i thawkka bel ahhin cauk pipa tuk rel i timh colh ding a si lem lo. Kan duhnak, kan khuaruah, kan thinlung, kan thiamnak nih a chei rih lomi direct tuk i kan rel tikah a kan thawt kho lo, a kan thawt lo tikah sau ei kan huam ti lo. Cucaah, mah uar phun deuh a simi in i thawk ah a `ha. Mah duhmi te kan rel ahcun a sullam kan fian lo zongah fian colh kan duh, cu nih cun rel chin duhnak ah a kan hruai. Mahbelte mah huammi lawng (Korea fidi le fitlaw pawl kong, pumpululh kong, i tuknak kong tbk) kan rel peng ve i carel hi kan nun lam caah a herh ti tuak loin umharphen sawsawh i a relmi kan si ahcun, kan carelnak zong cu umharphen men sinak in a dong ve ko lai. Cucaah, ule nih an chim tawn,”Acheu ca cu a liah te von liahding phun men khi an si, a cheu cu tlawmpal hmawm i chaak `han ding phun an si, acheu cu cip cikcek in khai i dolh ding ca pawl an si” an ti. Liah ding le hmawm luala ding lawng i kan i zaat lo ding hi a biapi ngai ve.

Cun phunkhat von chap rih ka duhmi cu, atu hrawng cu rel ding Laica tete zong an hung chuak pah len cang. Lai cauk pawl zong hi a zapi kan rel huam lo hmanhah kan uar phun deuh te tal cu rel khawh kan i zuam a hau, kan huam lo tuk hmanhah i hneek pah a hau. Zeicahtiah, Lai cauk chungah Lai sining, Lai nundaan le zatlaang nun tampi aa tel. LBC sining i chim ahcun, cadang kan rel huam lo hmanhah Deirel le Muko  tal hi cu rel khawh kan i zuam cio awk a si.

Carel bak lawng  hin mitling ah kan i chuah lai tinak a si ruam lo. Mitling sinak ahhin cawnmi fimthiamnak le carel tepawl lawngin a rak za hrimhrim lo. Kan nunlam ah kan tonmi ( experience ) hi mipuitling a kan sitertu pakhat a si ve. Kanmah pumpaak nih ton khawh lomi thil kongah midang nih an tonmi i hrawm khawh a hau. Cu ti i hrawm khawhnak dingah carel a rak hauhnak  hi a si.

Carel a `ha ti cu zapi nih kan theih dih. A rel tu hi kan huam lo, kan i hnee lo. Pathian `hawnnak he von tahchunh ka duh. Pathian cu zeizong thilti kho ti cu kan zumh, asinain a `hawnnak kan hman khawh lo,kan hman huam lo i, kan  hman duh lo ahcun a zumh te lawng zumh men in a za lo. Cubantuk carel zong cu zeitluk i a va `hat ko zongah a rel lomi caah cun carel a `hat hi santlai lo a si ko lai.