Lai Pipu Holh Phungthluk

Ei ding in nung hlah, nun ding ei
Sullam: Mi dang thazaang lawng i rinh citcet hlah. Na paw ca cu nangmah tein ttuanhawl ve.

Ei hre ttuan daw
Sullam: Orka i sum i thazaang fak piin chuah. Orka i sum i rian tu fak piin ttuan.

Fa hrin hnut, ngakttah tuan
Sullam: Tar lei sang i ngeihmi fale cu an ngakttah a tuahn. Ziah ti ah cun tar lei sang ah cun thihnak lam he an i naih cang caah. Thih tak tuan deuh si.

Fa khat hrin le pangpar tonh
Sullam: Nu cu fakhat an ngeih bak in par chin in langh chin an co.

Fa ttha lo ngeih kam thlam
Sullam: Fa ttha lo nih cun nu le pa bia an ngaih lo tikah nu le pa nih kan sikcaknak hna ah kanmah lam kan ba.

Fa thih hnu hlei donh in
Sullam: Harnak le thilchia a chuah hlan ah i ralring ttung lo i harnak le thilchia a chuak dih hnu in i ralrin i timhcia tein um.

Fahniang thih le ngalcar khawn
Sullam: Ngalcar i khawn hi a fak bikmi a si bantuk in kan fale a hniang bik an thih ahcun kan caah a hlei in a fak khun. A fak ciocio ko nain a fahdan aa khaw lo.

Falai le hreh pheh
Sullam: Falai cu u le nau he an i kom kho tuk lo. Phun dang deuh tein an chuak.

Fanu ttha le loram ttha
Sullam: Fanu ttha nih cun inn le pawngkom vialte a zohkhenh dih. Cu leng ah va an ngeih tik zongah va ttha te an tong.

Farhmui ber hlah, khangca par hlah
Sullam: Hawi simi cu si a duh ve ko nain a sining nih a phan lo.

Fanu pakhat thawng, lopil pakhat thawng
Sullam: Fanu ttha nih cun va ttha te a ngeih i rualchan zong a pumhkhawmh khawh hna. Culeng ah cingla rualchan ttha zong a ngei.
Fim phun dang, hruh phun dang
Sullam: Mifim ruahnak le mihrut khua tuakdan mi cu aa dang hrim ko.

Fimthiamnak nih mit a auter
Sullam: Fimthiamnak cawnnak nih mi cu a fimter chin lengmang i catang sang deuh a kai deuh poh ah a fim deuh chin lengmang ve.

Fiar thang chia, hal thang ttha
Sullam: Thil fiarmi nih cun mah lam thang a chiatter i ttha tein halmi nih cun mah kha a thang a tthatter.

Fuarpi ti hal, lungchung pa duh
Sullam: Lungchung tein ngiatmi/ duhmi ngeih cu a fak khun ko. 

Fuarpi tihal, tluang zuun ngaih
Sullam: Ram dang le khua dang i a ummi an zuun ngaih cu a fak khun.

Hawikom ttha le liangdanh ttha
Sullam: Hawikom ttha cu harnak caan le sichiat caan ah mi an bawm. Hawikom ttha nih cun a hawikom kha zeitikhmanh ah a kal tak bal lo i a philh bal lo.

Horha bang ka tla cang
Sullam: Ka ruah i ka thawk cang caah a dih tiang, ka phan tiang ngol lo tein ka tuah lai.

Hlawhleng sia khalh in
Sullam: A herhmi rianttuan lio ah a herh lomi kha banh pah lengmang. A herh lo ah caan liamter i nihhlawh kha a lak ah hman, dihter.

Hmachia dam fawi, minchiat dam har
Sullam: Hmachia cu a loh a fawi nain minchiatnak cu a loh a har tuk.

Hmanung fungfek ing
Sullam: Sualnak tampi tuah ko nain a donghnak bik tuahmi theng ah sualman in.

Hmatthing khawn fak, sual tthing phuan fak
Sullam: Kan rak sual tuk lio kan thiltuahmi vialte kha liam cang seh ti ko bu ah a thar in kan rak sual ciami kha a puan tthan tuk cu a fak tuk hringhran. Intuar awk ah a fawi lo.

Hmuh duh ko nain zoh duh lo
Sullam: Duh tuk ko nain mah le tawkzawn a si lo tikah zoh leng zongah tthathnemnak a ngei lo um ko seh ti i kal tak.

Hmuh lo thei kawl in
Sullam: A um ma um lo, a si ma si lo ti zong ruat sat lo in hawi chimmi poh zumh.

Hmur fong bia la, zaang fong tthahnem
Sullam: Bia duh tuk cu kan caah harnak a chuak tthan, tazacuai zong i huah a fawi te. Nain Zaanghleicawi cu kan caah a ttha i khuasak timtuknak caah zong ah tthathnemnak tampi a ngei.

Hnak kar tenh nuam, mi kar tenh har
Sullam: Mi nih tuakpiak ciami lak le hman cu a fawi te ko nain mah nih tuah le kawl cu a har.

Hngerht ka lung umpu tia
Sullam: Mah zawn lawng i ruah, mi nih chimhmi zeihmanh ah rel lo, keimah ka thiam bik, ka si bik ti i i ruah.

Hrangngawn nuva bang
Sullam: Nu le va tthen lo tein tih tiang lungkhat tein um.

Hriktida hmanh thak hlah
Sullam: Pakhatkhat a can tikah zeihmanh a poi lo cu tinak zawn ah hmanmi a si.

Hrincho fa nih mi iap hna
Sullam: Minthang cu mi nih an hngalh hna i teinak a hmuh zawn ah chim in hmanmi phungthluk a si.

Hruh dang long, fim dang long
Sullam: Hruh zong an i lo lo i fim zong an i lo lo.

Hruh hmasa, fim hmanung
Sullam: Tuah lio le herh lio ah hngalh ttung lo i, tuah dih hnu herh ti lo hnu ah lungpem i hngalh tthan.

Hruhthu khuai tuk in
Sullam: Rianttuan zia thiam lo tikah harnak a chuak tawn.