Ho Nih Dah Sex Kong Hi A Kan Cawnpiak Te Lai? >>>>>>>>>>>>>>>>>>>>>>>>>>

"India ram ahcun Nu sinak in, Caw si ah hna a ngam deuh. Caw cu zantlai hnu anmah lawng an vah zong ah tlaih hrem an ton lo caan a um pah tawn nain Nu cu chunceu lak I hawi le he leng chuah hmanh ah zuldawitu an ngei zungzal" ti a si. Vawleicung ram vialte lak ahhin India ram hi zapi lak ah nupasinak (sex) kong chim a duh lo bikmi an si. 

An sianginn ah sex kong cawnpiaknak a ngei bal lomi miphun, chungkhar ah nu le pa fale sex kong cawnpiak cu sual ngan ah a ruatmi miphun an si. A si kun ah, ziah hme hi tluk hin India ram ah tlaihhrem a tam hnga? Kan nih kan Kawlram zong hi nupasinak (sex) kong chimh le cawnpiak cu zer tian le ur tuk ah a ruat dihmi miphun kan si ve. Sianginn ah siseh, chungkhar ah siseh sex kong cawnpiak cu ningzak thil ah kan ruah dih cio! Kawlram pawl le bang nihcun, Nu hna i an thilri min khi an ngei lo! Cu tluk cun lenglang ahcun an hrialmi thil a si.

A si nain, Kawl pawl nih caan reman hmuh ahcun Nu pawl tloh an duh lo zia keimahnak in na hngalh deuh lai.. Mirang ram pawl hi nupa sinak kong cu inn ah siseh, sianginn ah siseh ttha tein an cawn dih.. Kan Lai thluak tuak ahcun, an i tlai hrem dih lai ti awk an si nain Mirang ram ah tlaihhrem a tlawm lehlam hui.. Tha tein a kong aa cawnpiakmi miphun nak un, a min hmanh chim a duh lomi miphun pawl hi ttih kan rak nung deuh! A ttih in ttih i a hrial in hrial phun a rak si lem rua lo; fiang tein i cawnpiak i ningcang tein hmanzia i chimh hrin tu nih miaknak tam deuh a rak chuah ko rua hih..

Kan miphun zong i cawnpiak hramthok kan hau ve cang! Mahbal te, ho nih dah a kan cawnpiak lai? Pastor te nih biakinn ah hi bantuk an chim tikah, Pathian riantuantu pi i cu bantuk chim cu kan ti hna... NGO pawl nih chimh le cawnpiak an kan timh tawn nain mizapi cawnpiaknak ngeih kan zuam lo leng ah, vawlei lei riantuannak phu nih cu bantuk chim cu zer le tian  ah kan ruah i kan ttih hui hna..

Hi kong i cawnpiak hi kan miphun nih a herh hrimhrim cang..atu ning in kan kal ko ahcun Lai miphun lakah, tlaihhrem a karh chin lengmang cang lai.. Baibal nih zeitindah nupa sinak (sex) kong a kan cawnpiak? zeitindah kan hman awk a si? Zei bantuk in kan hman ah dah sual a si? ti pawl hi kan no liote ini cawnpiak dih kan hau cang.. Ho nih dah a kan cawnpiak lai? Pastor te nih a herhning in biakinn ah rak kan cawnpiak ko hna sehlaw rian hma a kal kho bik men lai dah ka ti..

Biahalnak: Careltu nang nih teh laimi sin ah nupa sinak ( sex) kong cawnpiak hi zeitin dah na ruah?

Catialtu: Ka U Lian