Hrang cal Le Pu Thir ( Pipu Tuanbia)

Khua pakhat ah milianpa nih fanu dawh ngai a ngeih i a min Khum Or a si. A fanu cu a zohthla ngaingai. Nungaknu cu ai dawh ngamsam i tlangval rual nih hin an duh tukah rawl ṭam tihal hmanh hngal loin an helh. Ngaknu cu ai zum ngai ve i tlangval rual cu zeirel loin a hei um hnawh hna. Tlangval nih ṭhit dingin an hal zongah va ngeih duh lo phun khin a um. A pa zong nih a fanu cu ai uang ngai i a zohthla ngai. Apa nih cun, “Ka thir sum, inntual in innleng ah a khing khomi cu chaw lo va loin ka fanu hi ka pek hna lai,” tiah a ti. Tlangval rual cu cu tluk nungak dawh ngai chaw lo va loin hun co lai cu an ruah ah, “keimah, keimah” tiah an i cuh i thir sum cu an cawi kho na loin an pang hri zong cat dih viar in an cawi len cu a hninh hmanh an hnin kho lo. An keng thi zong an i chat dih viar, an hrum he an ai he a zawt lam a zawt dih hna. Cu thawng cu khua dang tlangval zong nih an hun theih cio i an i zuam cio nain an cawi kho cio lo. Asinain an khua pawng i a ummi keitlau tlangval nih a theih ve i a hung tlung ve.

A thaizing ah a nu le a pa nih cun buh fun milu ngaw, sa fun milu ngaw an funh hna i Khum Or le a vapa cu a vapa khua leiah an kal. Cu ni cu tlangval pawl cu an zaang a zun hna i lokal riantuan zuam loin puan an i tung thlerh i chun nitlak an it ko. Hauka an lonh vial ah a vapa nih cun, “Khum Or ka rawl a ṭam,” tiah a ti. Cu karlak rawl ṭam cu,” tiah Khum Or nih cun a hun ti. Tlawmpal an kal ah, “Khum Or ka rawl a lam,” tiah a ti ṭhan buh le-sa cu a pek i a ei. A hnu tlawmpal an kal ah “Khum Or ka rawl a ṭam,” tiah a ti hoi. “Cu reru rawltam cu Keitlau maw na si, thianhring hme na si,” tiah Khum Or nih a hun ti. “Aw, Keitlau ka si hi na ka hngal lo maw,” tiah Keitlau pa nih cun a hun ti. Khum Or nih cun Keitlau a si lai, ti cu a zum lo nain a lung a hring pah. An khua an phan. An khua an phak hnu ni tlawmpal a rauh hnuah Keitlaupa nih cun, “Thaizing cu chiarchak chiarthlang ka hel lai,” tiah a ti i lamhla ngai a phan i a rau ngai. Cu hnuah, “Thaizing cu Kawl kil vai kil ka deng lai,’ tiah a ti i inn pawngkam ah a kal, chiarchak chiarthlang a hel.

Ni khat cu chiarchak chiarthlang ka vel lai a ti i Kawlkil vaikil a tlawn kar ah umpu chung i sathu a chiahmi cu Khum Or nih a va zoh tikah cun minung lu le ban lawngte a hmuh. A ṭih tuk ah zawt ai tim, raihrang fanh in a fanh. Keitlau maw a si ka hngalh lo a ti i, “Ka pa le nih hung ka la hna seh,” tiah bia a cah hna. Cu tikah a pa nih, “Ka fanu Khum Or a la khomi cu chaw lo va loin ka pek hna lai,” tiah a ti. Ahohmanh nih an la ngam lo. Hrang Cal le Pa Thir nih, “Kanmah nih kan lak lai tiah an ti.

Keitlaupa lo ah a rak kal kar lakte ah an vung tlung, Khum Or lawng cu a rak um. Khum Or cu a rak um. Khum Or cu a tha a nuam ngai nain an kalnak ding a khuaruah a har. Asinain Hrang Cal le Pa Thir cu meicum ah nurel nganpi a khuh hna i tithawl a hunh hna. “Ka vapa a hung tlun tikah meicum a hun dah ahcun tithawl ti hi tlawmpal in rak thle te u. Cun chiarchak chiafthlang ka vel lai a ti ah hin, lamhlapi ah hin a kal i a rau ngai. Kawl kil vai kil ka deno lai, a ti ah hin inn pawngkam ah a um tawn.

Cucu rak hngal te u,” tiah a chimh hna.

Keitlaupa cu zan leiah lo in a hung tlung. Innchung ah a hung luh cangka in, “Hum, Laimi rim a nam,” tiah a thil thumh pah in innchung cu a ngiat. A nupi nih, “Keimah pei Laimi ka si ko cu, Keimah rim teh na theih ko lai,” tiah a ti Tlawmpal a thut ah, “Hum, Laimi rim a nam,” a ti i meicum cungah a kut in a hei dah.Hrang Cal le Pa Thir cu an thin zute lemnak a um lo, umtu awk an hngal lo. Hrang Cal cu pa lungthawng deuh a si i ai ning deuh. Pa Thir hrimhrim cu pa ṭenglong mi ralchia deuh a si i a ṭih tukah a taw ṭhim tlum loin ai sim raihrang fanhbantukin a ther. Khum Or chim bantukin tithawl ti cu tlawmpal an hun thlet. Khum Or nih cun, “Cu chimh na ngaih lo cu aw, zuhui fa ti lam na thlet dih cu,” tiah thin ka mang in a hun raak i a ngawl. Zanriah an ei i, “Thaizing cu Kawl kil vai deng ka tlawng lai,” a ti i chiarchak chiarthlang a vel. A thaizan ah cun, “Thaizing cu chiarchak chiarthlang ka vel lai,” a ti i a nupi cu a tha a nuam ngai.

Keitlaupa hauka leng a chuah cang ka in Hrang Cal le Pa Thir cu a auh zau hna i “leklak” tiah an hung ṭum. An thil an timh zokzok hna i an kal. Lam tanṭim an kal ah Khum Or nih, “E, ka ngun chin khup ka philh,” tiah a ti. Hrang Cal nih, “Keimah nih ka vung lak lai khan, Pa Thir, ai chok chukcho ahopaoh nih aho nupi tiah in hal kun hna, Hrang Cal nupi tiah na ti lai,” tiah a chimh ta. Lam pawngah cun an ṭhu ko. Khuachia khuari rual nih, “Aho nupi dah a si?,” tiah an hal. “Hrang Cal nupi,” tiah ati hna i an len. Khuachia rual cu an hung i cuticun an hal lengmang. A hnuah cun a thin a hung ve i, “Keimah nupi,” tiah a ti hna. Cu cangka cun Pa Thir cu an tlaihhrem i a lei an tan i Khum Or cu an kalpi.

Hrang Cal cu a hung i, “Pa Thir, Khum Or teh?” tiah a hal. A holh kho ti lo. “Lawl-lawl-lawl” ti lawng a ti i a kutdong in khuachia rual luhnak hngerhte ka bantuk a kuami cu a sawhpiak. Hrang Cal nih cun vawlei kua cu chemphut in a chem i vawlei tang cu a hun bih. Khuari rual cu a hei hmuh hna. An vung ṭum. Khuachia rual nih Khum Or cu hnipuan chia an hrukter i a lu an kongh. Hrang Cal nih cun, “Khum Or sam peh zokzok u, a hnipuan hun pe dih u, Pa Thir lei hi hun bunh zokzok u,” tiah khuachia mal cu a hro hna i rianrang tein an hun tuah dih. Hlei an donh i Pa Thir le Khum Or cu a kaiter hmasa hna. Vawlei cung an phak in Pa Thir nih Hrang Cal cu hlei a phelh khanh i Khum Or cu inn ah a tlunpi. Pa Thir nih cun Khum Or cu, “Pa Thir nih a ka lak, Hrang Cal cu a umnak hmanh ka thei lo na ti lai. Cu bantukin na chim lo ahcun kan thah ko lai,” tiah lampi thluangthluan a ṭhih phaih, a sawilem pah i khua an phan. Khum Or pa nih, “Ka biakam a si lo maw,’ a ti i Pa Thir he cun ṭhitumnak a tuahpiak hna. Pa Thir cu lungawi ngai le hnangam dom in a um ko.

Hrang Cal cu hlei a phelhkhanh caah a chuak kho ti lo i khuachia nungak a ṭhit i khuachia sinah a um ve. Fa pahnih a ngei. Leng a tuh i, “Khum Or co kho ding ka si ahcun kum khat chungah vawlei chun law,” tiah a ti. Leng cu a kheu i lengzun cu kum khat chungah vawlei kua cu a phak. Lengzun ah cun rianrang tein a kai. A fale nih dawi an hun timh ah lengzun cu a phelh khanh hna.

An khua ah cun a vung tlung i nuhmei nu inn ah a lut. Cu lioah cun Pa Thir le Khum Or cu bawite bawi an rak i timh liopi a si. Khum Or cu chang funnak ah hnah a hal. Hrang Cal nih cun nuhmei nu cu, “Bukpi chungah ka um lai i Khum Or nih hnah a hung in hal tikah, buk chungah va zoh ko, na ti lai,” tiah a chimh. Khum Or cu nuhmei nu inn ahcun a hung taktak i hnah cu a hal. Buk chungah cun hnah a hun dah ah khin Hrang Cal nih a kut a hun tlaih. Khum Or cu a lau ngai. Hrang Cal nih cun, “Keimah maw na ka duh deuh lai, Kawi Thir thla?” tiah a hal. Nangmah pei a ka latu na si cu, na thi cang rua, tiah pei ngaihchia ngaiin ka um peng ko cu, nangmah ta kan vat ko lai,” tiah a hun ti. “Asinain Bawite bawi cu tuah ne ko kun rih u,” tiah Hrang Cal nih a ti.

A thaizing cu Bawite bawi cu an tuah i inntual khat in zupu an dap, sa an that. Inntual khat in an lam. Pa Thir cu pawngpi ai ponh, biarpi ai keih, tawnlo puan ai aih, chawn ai tonh i inntual laicer ah cun i zum ngaiin ai her luar ko. Cu lioah cun Hrang Cal nih a zuan hnawh i vainam in tan hnih ah a chuah. “Aw, zei bia dah?” tiah zapi tein an hun zuanhnawh hna. Cu tikah Hrang Cal nih cun a sining vialtecu a chim i Khum Or zong nih cun a hun chim ve. “A-a-a” a ruak zong fim awk a tlak lo; hauhruang chia lakah hei hlonh u,” tiah an ti. Cu hnuah Hrang Cal le Khum Or cu an i um ṭhan.