KA NU CHIMMI TUANBIA

Ruahhmai tete nih kan thlalangawng an rak phehmi zoh pah buin puanbu tangah ka nu chimmi tuanbia cu ka ngai. Ka nu mithmai ka zoh ngam lo. Cu zan cu kum 18 ka tlin zan a rak si.

1.

A chelcaante i thinghnah pakhat le pakhat hnur thawng dah ti lo a dai zirziar. Zan`im khuaking thlapa vang tang hmunhma pakhatte ah ngaknu pakhat, tlangvaal pakhat, za`ial kuttlai lung khatin an rak leng`i, lung khat tein.

2.

“Zei khua kan khaan ah dah a `hat bik hnga!” Awlokchong ngai in ka nu hraam thawng. “Ka ning a zak tuk” timi bia he ka u `ah thawng. “Mithmai chiat kan tong cang hi mu.” Ka `a aw a hrang pah. Ka pa tah, ka pa aw a chuak lo. Milengkhaan chung i chung tling tein an holh thawng cu ihkhun cung thazaang ngei lo kaa kualh buin ka vun theih. A hnu bikah ka pa aw a chuak. “Thil sining `ha tein amah hal hmasa usih,” tiin. ~ihphaannak le ningzahnak dah ti lo cun zei khua ka ruat kho ti lo. Ka mitthli dulhdulh in an luang. A ipmi ka sining vialte luang dih ulaw mitthli sinah hin tiin `ah len zongah mitthli nih ka duh lomi nithla pawl an rak hnawt kho ti lo. Thil sining a dih hnu ah a luang tawnmi mitthli, man an rak ngeih lonak kong ka hngalh caan a rak hnu tuk cang.

3.

A ka hrialmi mithmai ton dingah, a rak har bal lomi thil sining, an rak har ningcang. Zalong tein ka rak luhchuah tawnnak an inn kal dingah a rak zaang tawnmi ka ke, atu an rih khawhning cu. Kaar khat, kaar hnih, ka thaw ka vun i hriim ta. Ka kir ah maw a `hat lai. Ka kal ko lai dah. A zei si hmanhah tiah therh buin inn chungah ka vung lut.

Vanchiat maw van`hat dah. Amah lawng a rak um liote a si. A vun ka hmuhin a lau tukmi a mitfang, a raumi a hmai, cawlcaang loin a dir komi a pum he a rak ka don ka hmuh tikah. Lung khat tein kan rak len`i lio ahkhan amah maw i titer a rak thiam tuk, keimah dik ka lung a rak dor tuk.

A hmaika ka dirnak caan a sau cang nain a lu aa khun. A mithmai ka hmu kho ti lo. Kan karlakah biafang chim ding a um ti rua lo. Daihnak thawng nih ka khuasiksem a paih. Ka kut pakhat le pakhat kaa hnuai. Ningzahnak in lungfahnak a hung ngan deuh cang. A caah a ritmi thil men va si ding tiangin kaa siang ti lo. Caan tlawmpal ka lung a fim hnu ah ka bia piang tein a chuak. “Biathlum na ngeih lo hmanhah, na kaa in a chuakmi bia fiang kaa khat tein theih ka duh i a si.” Cu vial. Ka hnu kaa her i ka tli. Mah hi maw, hlen timi a si. Nungak pakhat a sunlawinak a dih hlei ah a nu sinak zong zawmhtaih chih a si cang. Lungfahnak nih rak duhmi thil vialte kha huatnak ah a thlen dih. Ka huat tuk tiin ka au pah lengmang bu ah a donghnak i ka rak huat taktakmi cu keimah tu hi a rak si. Keimah le keimah kaa huat khawhning cu.

4.

“Khuathlanglei ah a kal diam ee.” A thli tein ka u le ka `a bia ruah thawng. Tuarnak phuntling he a `hang cuahmahmi ka paw nih ni khat hnu ni khat aa hngal chin lengmang. Zeidah ka tuah lai. Zei lam dah ka zulh lai. Inn chungah awlokchongin kaa chawk. Zei khua hmanh a ra hlei lo.

Thadih le lungrawk in ka paw cu ka vun tawngh. Lungtuai ngai in thlalangawng kamah ka dir. Ka thawpi atu le atu ka chuah lio ah ka ruahnak maw, a tak dik, ka paw cawl seh law ka lawhter. Ka lu ka vun khun i ka paw lei ah ka hna cu ka vun naih. “Ka nu” ti ngakchiate auh thawng bantuk. Mitthlaam ah ngakchia duhnungte nih a vun ka nih. Ka paw cu ka kut hnihin ka vun pom. Ka thisen in a chuak dingmi ka fa pei a si cu. “Ka fa” tiin duhsah tein ka auh chunh.

Vawlei a har zongah a nuamh  zongah na nung lai. Na `hang lai. Aho ca hmanh i `hathnemnak ka chuahpi khawh lo hmanhah ka fa caah ka nung lai.

Sullam phuntling he a ka zoh tawnmi mitfang le innpa chakthlang hmurka vialte. A zei zongte. A biapi ti lo. Thazaang in ka khat cang.

5.

Sualnak tuah tikah mitchinh in hrial khawh  a si. Ka rak tonmi thil sining hi sualnak a rak si ahcun ka nun chung tu cham ko ning. Ngaknu cu ka si ti lo, asinian hringtu nu cu ka si ve cang lai.

(Rita ~ial Meng nih Muko Mekazin, Nunphung le Zatlaang Thanchonak Bu, Lai Baptist Church, Yangon, September, 2005 ah a `ialmi chungin laakmi a si.)