NUN VAN HAI IN

                                                                

khupthi hna he siangruun panh caan. Lomhnak  nun diriam in an caan tha an hmang hna. Cu lio ah ho hawikomtu nei lo a mah te lawng lileng in siangruun ken te ah a um peng mi nute nih ka thinlung a ka tonghtuk. A zal cu a chia nawnte a si cauk note book a chia nawnte pa hnih le khedan pakhat le cafung a par khairiat temchom mi le a chuncaw fun dah ti lo a dang aa kenmi um lo. A hawikom sin a kal ah an rak vuak. A ttah caan ah hnemtu tha a nei lo. Sianginn kai i ca thiam lo deuh ah an nih sawh. Lungdong le mithli he ruun Inn a rak panh tawn. Ka nu sianginn kai ka din cang lai a ti hi a tlawm ve hrim lo. A mawh lo ni tin nehsawh zomhtaihnak in a khat. Nichiar zomhtaih le a caan i tah peng nakcun a nu sin I lungdai te um cu cu a duh deuh cang. Nikhat cu a mithli he siangruun in a a rak tin. A nu nih tualpar in a rak don I a ttangnem te ah a van pom.

Ka fadawt zeidah cang tiah a van hal. A mithli he a fanu lyly nih ik thliahmah tein a lungfah nak cu a nu hi tinhin a van chim. Sianginn ka kainak ah ka hawi le nih ka cauk an ka thlehpiak dih tiah a nu cu a van chimh. A khup pahnih in thi he hnai he a hmuh cun a nu nun nih a celh ve hrim lo. A nu nih a fadawt a mithli le a tah aw a thei cun a dang a kharh I a mitmu chungah mithli fim tete a dil. A kut nem tein a van tlaih I a ttangnem teah a van pom.

“Ka fa veimu hringtu napa nih an kan liam tak cu e kan vanchia tuk hringhran e, a sinain nuhmei ngakttah sin ah zungzal dong lo dawtnak he a kan umpi tu Bawipa a um. Khah tap ti hlah mu ca fak piin na zuam lai I a tu I an nih sawh tu hna hi an upat tu an si te lai.” a cawi I inn chung ah a luh pi.

“Ka Fa Ca fak piin I zuam ko kei cu ka tar cang e, ca na zuam lai pathian na thei peng lai mu ka fa “tiah a nu nih cun biathlum tein a fa dawt cu a hnemh tawn.

Lyly caah ruahchan nak nei lem lo siangruun panh caan hawikom ttha hmanh ngei lo in a caah a har ve hrim. Nungak tleirawl lio caan i nunhar in a caan a liam lengmang mi lyly nih a nu lungre thiehter le ngeihchiat ter lai phan ah a harnak hi a chimtuk lem lo. Hawi fadawt hna cu eidin thaw le thilpuan ttha tha, le khupthi hna he nunnuam in nican an liam tawn. Cu lio ah thlavai kiang lilengin lyly cu an siangruun a ken fiak hawi hmuhtuk lo nakah luhlinh in ca a zoh . Tanghra cu an von kai hna. Lyly hi a von nungak deuh i a muidawh si a pumrua that ning hi zalam a chawh zawn ah mihrut hmanh nih hnu lei her ta lo an um lo. A nun ziaza nih a tha Pathian theituk fawn cun a sining cu a mahnak hlei a thei a ho an um lai lo. Semsi khak tein a um hawi dang kor tla muang in an um. Tla khipkhiat tein ca a rel a nu nih phaisa a pekmi zong sianginn  thawhburte lawngah a hman. A pawngah tlangval cu Rose par khua vah zelh in an i zel zongah Lyly nih cun awka thlum te a pek ko hna nain duhnak in pakhat hmanh a zoh hna lo. A caan ahcun a hawi le nih an hnakchuak , an sin um ter zong an duh lo. A mah sualnak lawng an kawl theu.

A caan ahcun ca zoh buin a mithli rualriat he thlaza a cam. Aw hi nun si vangh hi e Pathian ziahhme keimah cung ahin ka tha ve lo maw? Hi tluk in ka cungah hi thil hi na tlunter a ti caan hi a tlawm ve lo. A caan ahcun sianginn thawbur  a ngei tawn lo , a nu nih a van kuat lo caan ah vansang a au tawn. Phaisa cawi hna ning law zeitik ah kan pek hna ti kamh awk a har ngaimi LyLy a dirhmun a har ko. Mikhual ah a ho chungkhat remh neih lonak i phaisa chambau a heihjar lai ning. A lung dongh tuk ah chim awk theih lo ah an Pastor pa te inn lei cu mitchinh kam seh in a va kal. A sining vialte a chim dih hna Pastor te chung nih Lyly an zoh ah an lung a khawih tuk ve hna. Sianginn fee cu an pek.

Pastor Pa “Khah ka fa veimu nang cu Pathian na thei Na nu hawi dang he nai lo loh. Pathian nih na lam in hruai seh . Vei mu ka fanu hi vawlei lengluang minung ahhin "nangmah hi mivan chia bik Na si naisai lo. Dawtu kan Pathian hi mirum hnanak in Nangmah le Keimah bantuk ngaktah buangro sinah hin dawh a vel hi a ngan deuh cu "a ti a hnem len.

 Ly Ly cu lunglomhnak mithli he inn lei ah a lawi. Sianginn kharte ah a Nu sin a va tlung a Nu nih Ruun rep lo tang an inn lengin a rak don. An nufa an I ton cu an i kup , nguingui thlak in an ttap. An I ngaih tuk ah pakhat le pakhat mithi bang an I zuun muai.

A nu nih maw "ka fanu dawt tluangdang kan hram fah cu e na nu ka lilen ka celh lo ka fa" a fanu cu a biangki sen ah a nu hmur a caak nawn tein a van hnamh cu lyly biangki cungin lomhnak mithli zur kiarmar. Aw sunghno nu le dawtnak hi tluk a sunlawi hi a ti. Caan rau lo ah Lyly cu siangruun kai than ding si. A nu zong a tar ngai cang. A kal lai ah a nu nih biacham za a cah. Zan an inn ah “kha ka fanu Lyly veimu Nang cu  hi vawlei cungah kan ngeihchunmi pakhat lawng na si. Ca i zuam law catang sang pi tiang phan ti kan duh. Na nu hnu maw ka zul lai cih awh ka fa”.

“Riantha na hmuh tik zong mi zohchun tlak in na um lai. Kan mah bang mihar sa hi na bomh hna lai mu” a ti. Zinglei cerlian ninu a hung chuak A nu nih Ly Ly chuncaw caah tin an arpi pakhat cu a thah i Ly Ly hawi Par Ku zong rawlhrawm an kawh an pathum te cun rawl an dum ti hna . Chun te cu a fun banhla thlaar khat le ariti zong lampi ei awk ah a ken ter chih.  Sunghno a nu nih an khuachuah hauhngar tiang a hei thlah. An Nufa sian lo bu mithli he za an tian riangmang.  Camin puai lai a si cang caah Lyly cu mitkuh cim lo in ca a zoh. An khan ah pakhatnak le pahnihnak hi a hmu peng. A hawinu Chinku hi Pastor fanu si an i daw tuk. Chinku nu le pa zong nih an chung chuakfa bang an zohthla. An sayate zong nih an dawt tuk. Kum caan a liam lengmang i camim puai cu an tuah.  An saya te zong nih an dawt tuk.  An caminpuai phitnak zong tluag tein a tuah khawh caah a tha nuam ngai. A donghnak bik Subject pakhat tuah ding aa ba, Pathian sin ah lunglomnak bia le bawmhalnak biachim  a daithlang bal lo  A donghnak zan cu ngelfet deuh in ca a zoh , a cabuai fate cungah cikhat te a ngu , zanmang lei ah a lan. Cu lio ah a nu le pafiang tuk in a hmuh hna. A nu nih “Lyly ka fa dawt kan chim mi kha philh hlah mu. A tu na pa nih a ka don cang”. A ti a nu le pa cu an kal. Lyly nih “ka nu le kapa ka hngak uh kan ngai tuk hna. Nan ka daw lo maw? Nan sinah ka ra ve lai” a ti hnu lei her lo an kal tak. Cu lio ahcun lyly cu a celh lo  a tap thluamah. Mah kha mangcang hlan in a rak um , Chin Ku nih “lyly ka maw zeidah cang na pawngah ka um ko e tap hlah na mang maw chia hi innpa kan.thangh sual hna lai” a ti. Chinku nih a tangnem ah a van pom , a thawpi a vanchuah tha ba ngai buin “ aw sorry ka mangah ka nu le kapa ka hmuh hna I”  a bia a peh ti . A thaizing cu lungnuam lo ngai in sianginn khan ah camin puai cu an phi. Zan lei a donghnak History an phit ahkhin thlalangawng hram in Pastor le an sayaci kha bia an i ruah khi Lyly nih a hei hmuh hna. Zei ah khin a rel tuk lo nain a lung a tuaitam nawn.

A ca cu a van dih sayacipa nih “ka fanu lyly na phi kho maw? a ti a liang tein a hei kuh I a zungkhan ah a luhpi. A sayacipa cu a tih tuk mi sinain tu cu a mithmai ah zaangfah nak muithlam te khi a hei hmuh. Pastor pa zong a hunglut , a biangki a sen a umtu aa dang bia chim ding aa tim nain a dang a kharh . lyly nih aar tiamua tein a zoh ko hna zeidah cang hnga tiah a lung a tuai. “Kha ka fanu lyly nang cu nusal lungput na ngei , a in tuarziatu thiam ko mu... a bia peh kho lo pastor pa a hnrom a van I thian , pacan cuh in a bia van peh.

“Na nu kha nizan zaan lei sangah a nunnak liam tuan ah chimding si ko nain" Lyly molh a tim cang sayaci pa nih a tangnem ah a van pom ka fanu a tuarzia.thiam ko tiah a van hnemh.

Tlawmpal ah Chin Ku a khan in a hungchuak ve. Zungkhan cu ngaihchiat nak tichum a zel trahnak thawngin an siangruun a kheh dih hnik. Pastor nih a bia cu a van peh. “Nizan zan lei kha ruahpi a sur tuk i rial hna kha a tla. Mah lio ah na nu a mah te lawng locul ah buanbok le hmaihrem tal zuar dingah ka va tlat lai a ti a kal, Lolam a hlat ngai caah  zanlei ah ruah nih a Surh I dornak deu zong um lo ,zingka kha nikhua tha ko sawk tiin chinchinh ding zong ai ken lo i mah ka locul ahcun ruah nih ahlawm e”. tiah a van chim. Ly Ly lungthin a kekkuai dih Chin Ku nih a tangem ah a pom I an pahnih in an tap, an hawi le zong an kiang ah an hungra hna i an mithli rualriat he an Pastor biachim cu an an ngai.

 Pacan cuhin a bia a van peh “ Zingka tiang a inn a tin ti lo caah khuami nih an va dothlat, Na ni (Tin Iang nu ) kha na nu nih locul kal lai a rak chim ta i mah ka ahcun khuami nih an va hmuh. Mah lio ahcun a thaw a um ti lo e, tuzing kha a ruak an vantlun pi. Lyly cu ngartor in a um i mihrut bang chonh zongah mi a let ti hna lo. Chin Ku nih Ly Ly umtu a hman ti lo cu a van theih thang piin “ Ly Ly! Ly Ly ka aw na thei maw? a van au tahwng an theih in an Sayakyi pa nih zokzok in mibawmtu a hei auhter hna i tlangval rual nih sianginn khan chung lei ah an luh pi. Sayakyi pa zong a cel ve hrim lo. Duhsah tein Ly Ly cu a hung I hirm I Pastor pa nih a tangem ah a hunpom hnemnak bia thlumthlum in zong nih amithli a hul ter kho lomi Ly Ly zoh ah nun nih a celh lo.   Za lian ( An khan chung hruaitu pa nih) an sianginn kai ti hawi a van pumh khawmh hna  an zal chung phaisa an ti khawh tawk cio an van i khawl  KS Singkhat te a chuak. Cabawm tein a van I put I Za Lian nih “lyLy aw hi vawlei cung cu kan mah duh bang a si thiam lo e. Kan nih nih cun e a hnemzia zong kan I thiam lo mah te hin ngaihchiat kan I hrawm pi ve” a ti a kut teih a van hum ter.Chin Chin zong a celh hrim lo a ttah kiarmar ve. Thantlang Attah -Kah 1 I mivial te an lau dih LyLy thawngpang an van theih cun sianginn sang mihrut hmanh a hmai a panh kho hrim lo.

Pastor pa nih zungkhan ah thlacamnak a van ngaih dih inn lei cu an van panh ziahmah. Aw minung hi zei dah maw kan cungaj a tlung ttheu tawn e. A thi dih ding lawng te kan si ko nain a tak in kan cung I thihnak a van tlun tikah taksa nih tuar awk a tha hrim lo. Lungthin hi a kekman dih a zal tawn. Ly ly cu sianginn kai a van peh than cathiam tuk a nunnem tuk fawn. An sianginn ah scholarship a hmu USA ah Doctor a va cawng I a dih ramtha ah uk lan khawh a si ko nain Lairam ah ka miphuj harsa in a hrum ai mi.hna chanchuah tu ah kei cu Bawipa nih a ka thim ti kha fiang tein a theih caah Lairama rak kir than.

Lairam hmanh ah khuapi hmun tha ah um lo I miharsa hna sinah heh tiah rian a tuan. A hlan I a rak nehsawh tu hna kha a tu ahcun Lyly hmai an zoh ngam ti lo. A sianin lyly cu mifim cathiam ai hngalhnak ah minau tat nei lo tein Kguate mi hna sin ah a nunnak cu nuam tein a hmang. Sunghno a nu nih a rak tiam bangin miharsa hna bomnhchanh hi a si khawh chungin a zuam. Tam le khua mabg zongah a caan ahcun khuate dabg zongah a va kal I mizaw a va zoh tawn hna. A hram thok ah harnak le ngaihchiatnak nih tichum bangin a zelh mi nu cu pathian kha fek tein a tlaih caah a donghnak ahcun teinak luchin he Lairam caah nusal ttha pakhat dirhmun tiang a phan kho ti nu a si.

Tlerlung

Melbourne