Thisen Silo, Na’n Dawtnak

 Catialtu: Ms Sui Par ( USA)

Nikhatcu mipa pakhat Pistol aa put i, angki fualpi aa hruk fawn. Ka tih tuk i hnipuan kan chiahnak ah ka thup. Ka sin lei a rak panh thluahmah, a ka therh tuk. Ka thawchuah zong ka dinter kho lo. Hnipuan kan chiahnak cu a awn i, ka sam in a ka hnuh.  Ka thi cang lai tiah ka  aww thereng in ka au;  Ka rak au chuak  i ka ihnak ah a si. Nurse nu nih “Are you ok?  tiah panhsialmal in a ka ti. Ka chawn lo. Ka thlanhripi nih a ka pei. Towel in ka thlan cu a ka hnawh piak. “You are safe here. Don’t worry” “Hika hin na him ko, na thinphang hlah” tiah a ka ti. Ka kut, ka ke vialte a hrawl dih. Ka ba ngai fawn. Thlalangawng in  tual ah minung an i chawkmi cu ka va hmuh hna. Where Am I? Khawika dah ka um? tiah ka ti. “You are in Hospital (Sizung ah na um)” tiah Nurse nih cun a ka leh. Ka hmai a ka tongh, ka lu ka muai i ka lu cu puan in an zual. Ka ban ka zoh i “si” chunhnak a um. “What happen to me? Zeitindah ka cang?” tiah ka hal.  “ You are hurt, and your uncle will come to pick you up soon” (Na khawng, na pu a ra lai i a rak in lak zau lai” tiah a ti. Ka lu ah an tuammi puanzual cu a lak i a kal diam.  

Ka hnathlam ah hngakchia tah thawng le khuari hna chet thawng lawng a um. Ka fanu suisui cu misual nih tlaih hna sehlaw, hram  hram in an hnuh chih bantuk in ka mitthlam in ka hmuh. Ka fanu kong ka ruah cuahmah lio ahcun, Innka “rung!” tiah a hawng i laulengmang in ka zoh. Ka u Pa Hre a si.
“Sung te na thu ko maw?” a ka ti.  Hmaipanh ngai in “aww ka thu ko hi”, tiah ka leh. “Ka u Pa Hre na ra i ka lawm tuk” tiah ka ti. “Zei ruang ah dah sizung ah ka  um?” tiah ka hal. “Naa thei lo maw?” tiah a ka ti. “Aww, ka thei lo. Pakhat hmanh ka thei lo” tiah ka leh. U Hre a rak phan hnu ahcun ka hirhiar a kawk ngai. A dam ngaimi ka  lo. Ka lu belte ka tongh ahcun a fak pah. U Hre nih, “inn ah ttin khawh a si cang. Zei hmanh phan awk a um lo tiah doctor te nih an ti. Cucaah, Inn ah tin hmasa usihlaw, a hnu ah kan chim te lai” tiah a ka ti i, inn ahcun kan ttin.  Zaan lei suimilam 3: 30 PM a si cang caah, U Hre fapa, David le Ka fanu Suisui cu an sianginn ah kan va lak pah hna i, kan nufa in U Hre te inn ah kan ttin.  Inn kan ttin pah in lampi ah U Hre nih, “Suisui pa ( Pa Hmung) cu palek (police)  nih an tlaih i Palek sakhan ah a um ko. Kan pastor pa  nih a va kal hnawh i, zeitindah an rak ti  te lai timi cu ka thei rih lo” tiah a ti. 

“Sui Sui pa nih an velh kha naa thei lo maw? Nan innpawng ah a ummi, mirang nupa nih police an auh hna i a si lai. Police nih sizung ah an in kalpi i, Pahmung belte Police sakhan ah an kalpi. Pahmung nih Pastor pa a rak chawnh hnu cio ah pei nan thawngpang kan theih ko cu” tiah a ka chim.
U Hre nih kan sining kong a chim ahhin tlawmpal tein ka theih dih than.  Pa Hmung he chun ah bia kan i al lio kha ka mitthlam ah a rak cuang. Highway cungah kan um lio a si. Kan sinak kong cu ka ruah pah lio ah, U Hre nih, “Pahmung he zei kong ah hme nan i sik” tiah aka hal than. “Zei hmanh a si lo e, Pa Lian he nan i duh  tiah a ka ti peng i,” kan i duh lo” tiah thate in ka chim ko nain a zum duh lo. “Nan i duh ko; a it zong nan it tti cang lai; kan zumh bak lo; cucaah, i tthennak lehhmat kan tuah lai” ti te hna in, rian a rak tin bak ah a ka ti. “Asilomi le asilomi hi chim lengmang tuah hlah” ka ti i, “ka chawnh hlah!  Mihrawk hrawl, Lih hi chim lengmang hlah! Na sining vialte cu mi nih an theih dih ko” tiah a ka ti. “Ahodah mahbantuk bia cu an chim” ka ti i “an theih dih ko” a ti. 

“Hika ah chim lo, Laitlang, Lung Molh khua tiang ah na kong a thang hi na theih lo maw?”  tiah a ka ti.  Cun, aa lak rih i, “Na chung le zong phaisa kan kuat lo mi hna an um lo, nain lawmh bia chim cu chim hlah; mikip sinah kan nih cu phaisa an kan kua bal lo, Sung Sung vial cu thideng in rian a tuanter peng tiah mikip sinah ka thang an ka chiat” tiah a ka ti. “Dawtnak a theithiam lomi, mihrut chung nan si” tiah ka nulepa tiang a vawlhpamh hna i, ka thin a hung tuk ve caah, “mah ti cun ka ti hlah!  Na duh le ka tthen” tiah ka leh. “Ka nulepa cu mahbantuk biachim a hmangmi an si lo; aho sin in dah na theih? Na far Khuang Ci sin in a si ko lai. Biaduh le hmursau bia kha zumh lengmang hlah! A umnak hmunin Vulei kili ah bia a vahter. Asilomi lawngte a chim fawn. Ka ta cu, a nupi nih a uk le kan nih cu Phaisa an kan kua duh lo” tiah  telephone a chawnh mi hna sin paoh a chim. Nain ka theihter duh lo. Ka chung le Phaisa kan kuatmi hna zong hi na tuanmi chung in a tel lo. Keimah ka hlawh mite kan kuat ve ko hna. Cu zong cu an theithiam lo” tiah ka ti ve tiah U Hre cu ka ruah.

Kan i sikning a hram thawk cu, Keimah hi coka ah rawl ka chuang. Pa Hmung hi a riantuannak in a rak tin kate a si.  Coka ah a rak lut i “Pa Lian he nan i duh. Thatein na chim duh lo” tiah i siknak biahram a thawk colh. A ka ti ning a fak tuk caah ka celh lo i ka leh ve mi a si.  Ka thinhung buin, ka duh le tlangval cu ka ngei khawh ko. Keimah nawl a si’ tiah ka rak ti. Keimah zong ka palh ve ko. Thinhung buin a silomi bia tampi ka chim sual ve. Pa hmung cu a thin a hung tuk i coka ah thilri vialte a hui dih. Tihang suahnak keuku lianpi in ka lu ah a ka tuk. Ka tlu i keimah le keimah ka thei ti lo.

Pa Hmung hi sik a hmang mi  a si lo. A nun a nem. A holh zong a tam lo. A dawt zong a ka dawt ngai. Atu bantuk in kan i sik hi zeibantuk khuachia dah a chung ah a lut hnga. A ruah awk ka hngal lo. Pa Hmung he hin a duhte in a ummi kan si lo nain kan um hnu ah cun kan i duh ngai cang. Ka bochan i ka zumh ngai fawn. “Ka chuahka in nungak thathi ka ngei bal lo. Nangmah  hi  ka ton hmasa bik nungak na si i, ka nupi zong na si” tiah a ka ti zungzal. Pa Hmung a nun ka zoh tikah ka lung a tling ngai. Pa Hmung he kan i thitnak hi kum 10 a si cang. USA, Hartford khualipi kan phannnak zong hi 7 a si cang. Mahbelte voikhat cu kan fanu Suisui kong ah fak nawn in kan i si.  A tu hi a voihnihnak fak ngai in kan i siknak a si.

USA kan phan ka ahhin kan fanu Sui Sui kong ah fak nawn in bia kan i al. A ruang cu USA kalnak, Lahwahka( Immigration) interview kan phit lio ahhin Suisui hi an fanu a si rua lo. An benhmi a si rua tiah Officer nu nih lunghrinhnak a  kan ngeih i, Officer nu nih Pa Hmung cu, “Sui Tha Bor hi na fanu a si ko maw? Na fanu a si ko ahcun, ziah hi tluk in nan i lawh lo” tiah an rak timi kha a thin a khen tuk. Lahwahkah( Immigration) interview kan tuah dih in, inn kan phan cangka tein, kan inn ah pa a ummi vialte a thawl dih hna. “Ziah, na tthawl dih hna” ka ti i “Kan inn ah minung kan tam tuk. Sikan (discipline) a um lo” a ti. A dang zei hmanh a chim lo. Zeidah a thinlung in a ruahmi a si’ timi zong ka hngal lo. Cun, USA kan phan i Exodus Service ah riantuantu nute nih Pahmung cu, “Sui Tha Bor hi na fanu, nangmah na hrinmi bak a si ko maw?” tiah a hal rih. “Ka fanu a si. Ka hrinmi bak a si. Ka chung chuak ka fanu a si. Ziah mahbantuk bia cu nan ka hal lengmang” tiah a ing a puang i, a rak zai hnawh. A thin biatakte in a rak hung. A kut le a hmur zong a ther dih.  Officer nu nih, “sorry a si. Ka ngaithiam. “na fanu he nan i lo lo tuk caah, ka khuaruah a har i kan halmi” a si tiah a ti.

Exodus Service Office in kan ttin hnu ah a thinhunnak kong cu a chim. Keimah nih, “mahbantuk hna cu thinhung awk a si lo. Ka fanu a si ko ti law a za ko.  Mahbantuk ah thinhunnak langhter kha mual a pho” tiah ka ti. “Nu nih dai ko! Ka fanu a si ko mi kong ah mahbantuk biahalnak an tuah mi hi, nehsawh phun khat a si hi! Phundang in leh ahcun, nangmah an in mualphoh dakaw a si hi! Na fanu a si  ko maw? timi biahalnak cu, na nupi a uire maw? an ti duhnak a si hi na  fiang lo maw?” tiah a ka ti. 

Pehthan ding>>>>>