Zanlei ninu cu tlangkam ah a dir cang. Thlawh khawh
ti lo ding in liam zai ai rel cang. Melbourne khualipi zong i manh lo ngai in a
um. Miphun zakip kan lennak hmun nuam , ho hmanh thleidannak a um lonak ram.
Duh cuai in len khawhnak ram ahcun mikip nih an fuhpanh duh ciomi ram a si.
Ka sianginn kainak in ka bat deuh caah khua dawh
cuan ding in kai chok. Vanruah siamsiam
in a surmi lak ah mibu hna cu duhsah tein an kal hna. Ka angki banfualpi zalpurh
pah buin st kilda zalam cu duhdsah in ka van tan. Ka hnu in mi bupi nih an ka
zulh ruimai, keimah zul lo in an mah le tinhmi cio ah kal ding in cu ka hmun cu
an rak tan ve khi a si. Trafic hngak in
mawtaw chung ah a thumi hna ka mitsir in ak hei hmuh hna. A cheukhat cu mah lawng umhar ngai in an
um,a cheu cu bia an i ruah i an nih len
lio khi ka hei hmuh hna. Zalam cung ah duhsah in ai thawnmi mawtaw hna cu
pakhat hnu pakhat in an liam. Coffe dawr ah nugngak tlangval hna hmai tonh in
an thut buin an i tlaihmi coffe hrai hna zong cu fiang ngai in ka hei hmuh
khawh hna. zilthli nih ka biangki hna cu a van hranh caah duhsah in ka tak vun
hna cu an van i kor. Thawpi chuah pah buin khuasik cu tei khawh kai zuam.
Ka lam kal cu dir tung lo rang tuk lo in hmai lei ah
ka kal thluahmah. Ka kiang ah a cheukhat cu an kawp hna he kut sih in zalam an
leng. Zan khuamui nih Melboure khuapi cu khuhmui a van timh bang in lamkam mei
tete hna zong an van ceu ve cang. Vanlei arfi tete hna zogn fiang tuk lo in a
hung cuang ngia ve. Khualipi laifang in a luangmi Yaravile tiva hna cu mei nih
a van ceuh caah tleu dildel tete in hmuh khawh an si. A caan ah rili cung khualtlawngmi tilawng pipi
hna khi ka hei cuan pah . Tivakam a keomi Thingkung borh cung ah riahruun a
hlam vanva han zong mui lai cun an mah el hmun cio ah an merem cang.
Keimah lawng in khua ka ruat than aw nunnak hi dah
zei hme si? Kai fiang kho tawn lo. Hi ramdawh le hmun zong ahhin hei um ko hmanh ning law
lungthin daihnak tak ka hmuh khawh hlei lo ahcun nihin i ka hmuhmi lomhnak a ka
petu hna i mimei bang an tian ko lai hi teh ti ka van ruah tlawm pal ah ka khua
ruah cu ka ngol i inn tin ding in ka zalam cu ka peh than.
Tlerlung
Melbourne
Comments
Post a Comment