tlerlungthawng_sidebar_feed_AdSense3_1x1_as
Minung hi ser kaa ah cun thil ti khawhnak lianngan le ruah khawhnak
sangpi neimi a rak si. Amah ah tlinnak a
um i Pathian he i pethlai in a um. A
ruahnak cu a thiang i ai tinhmi zong a sang fawn. Sihmanhselaw, a nawl ngaih lo ruangah a thil
ti khawhnak cu an lo i mahzawn lawng ruahnak nih dawtnak hmun cu a hon
rolh. A thil ti khawhnak cu sualnak
ruangah cun a dih i pumsa in sualnak ral cu a do kho ti lo. Sehtan sal a si cang i Pathian bomhnak tel lo
ahcun a tang zungzal ding a si ko.
Tukforhnak petu pa nih cun minung sernak i Pathian nih ai tinhmi zeirel
lo awk le vawlei hramainak le rawhralnak in a khat ding hi ai tinhmi a si. Cun, hi harnak a tlungmi vialte hi Pathian
nih minung a ser caah a tlungmi an si, ti i chim awk hi ai tinhmi a si fawn.
Minung hi a rak sual hlan ahcun, “Pathian fimnak le hngalhnak aa
thuhnak” (Kolose 2:3) Pa he lunglawm tein i biakchonhnak kha an nei tawn. Asinain a sual hnu ahcun thiannakah lomhnak a
hmu ti lo i Pathian hmai in thuh awkah ai zuam.
Cucu atu tiangin ngaihchihnak a nei lomi hna minung cu a si. Pathian he an i rem lo caah Pathian he i
biakchonhnak ah lomhnak a nei kho lo.
Pathian hmaikaa ah misualmi nih ai lawm kho lo i mithiangmi hna he i
hawikomhnak zongah ai nuam kho lo. Vancung
hmanhah khin luhter va sisehlaw cukaa hmanhah cun ai nuam kho lai lo. Midang caa zawnruahnak in a khahnak hmun,
lungthin vialte nih donghnak nei lo dawtnak in a khatmi Pathian thinlung he i
remte i an umnak ahcun a lunthin nih hawi lungthin he ai rual kho lai lo. A ruahnak, ai tinhmi le a tuahnak nih khi kaa
i a ummi mithiang hna sining he ai cakalh lai.
Vancung hla remhbu hna hmaichiattertu a si lai. Vancung cu a caah cun hremhmun a si lai i
ceunak le lomhnak hna i an hrampi, kan Pathian sinin i thuh awkah ai zuam
lai. Misualmi hna vancung i an um ve lo
nak hi Pathian nih zawnruahnak tel loin bia a caih ruangah a si lo; van innkaa
khar kanh an sinak cu mithiangmi hna he hawikomhnak neih awkah an tlak lo ruangah
a si deuh. Pathian sunparnak cu an caah
ai hlio cuahmahmi meiphu bantuk a si. Cu
caah, anmah tlanh awkin a thi cangmi hmai in i thuh awkah rawknak cu an i thim.tlerlungthawng_sidebar_feed_AdSense3_1x1_as
Sualnak khur chung i kan umnak in chuah
awkah hin kanmah thazang cun a si
kho lo. Kan lungthin cu a sual i, kan
thlen khawhmi a si lo. “Cu bantukin a thiang lomi minung chung cun a thiangmi
zeihmanh a chuak kho bal lai lo,” Job 14:4
“Cu caah minung cu a lungthin kha sining nih a uk ahcun Pathian ral a
si; zeicatiah Pathian nawl kha a zul lo, a ngaingai ti ahcun a zulh in a zul
kho lo.” Rom 8:6. Ca cawnak, miphun
nunning, ruahnak a phunphun chuahnak le minung thil zuamnak hna hi anmah le an
hmun cio ahcun an ṭhahnem cio ko nain, hi kong ahcun ti khawhmi an nei lo. Hi thil hna nih a lenglei sining thlennak
ahcun bawmtu an si: lungthin tu cu an thleng kho lo i zungzal nunnak zong an pe
kho lo. Cu caah a chungin rianṭuantu,
cunglei in a rami nunnak thar a petu misual nih miding i a can hlanah a
herh. Cu ṭhawnnak cu Bawi Khrih a
si. Amah velngeihnak thawng lawngin a
thimi thlarau hna nih an hon i ṭhang i Pathian leiah a hruai hna i thiannak ah
a phak pi hna.
Khamhtu Bawi nih, “Ahohmanh ti le thlarau in hrin a si lo ahcun,” mi nih
a lungthin thar, ruahnak thar, duhnak thar in a tharmi nunnak ah a ṭhan lo
ahcun, “Pathian pennak chungah an lut kho lai lo” tiah a ti. Johan 3:3.
Mi nih ser a si kaa i a neihmi ṭhatnak lawng hi ṭhanchoter awk a si, ti
i ruahnak hi a palh: “Sihmanhselaw
Thlarau a ngei lomi nih cun Pathian Thlarau sinin a rami laksawng cu an hmu kho
lo. Fiang ngaingai in an hngal kho hna
lo; laksawng a sunning kha thlarau lei lawngin hngalh khawh a si.” 1 Korin
2:14. “Hrinṭhan na si hrimhrim awk a si
ka ti na khuaruah har hlah.” Johan
3:7. Bawi Khrih kongah hi ti hin ṭial in
a um, “Bia cu nunnak hram a si i cu nunnak nihcun minung kha ceunak a pek.”
Johan 1:4. Amah min lawng hi, “vawlei
cung dihlak ahhin kannih khamhnak caah Pathian nih min a pekmi,” a si. Lamkaltu 4:12.
Pathian dawtnak, velngeihnak le pale hna bang i a mi zawnruahnak le a
ziaza theihnak thawng lawng hi a zaa lo.
Amah fimnak le a nawlbia, a zungzal a hmunmi dawtnak cung i dirhmi a din
ṭhat ning theih lawng zong hi a za fawn lo.
Paul nih, “Nawlbia cu a hmaan ko,” (Rom 7:16) a ti i, “Cu caah Nawlbia
cu a thiang i tuah awk timi cu a thiang a hmaan i a ṭha ko,” tiah a ti; Rom
7:12. Cun a lung ai tuai i a awlawkchon
lioah, “Kei cu sualnak tangah zorhmi ka si,” tiah a ti. (A hme 14). Amah nih thiannak a duhmi a ṭhawnnak
in a phak khawh lo tikah, “Mi lungrethei ka va si dah! Thihnak i a ka kalpitu pum chung hin
ahonihdah a ka khamh lai?” tiah a au. (Ahme 24). Hihi sualnak thilrit nih a nenhmi hna nih
ramkip le chankip i an aunak aw cu a si.
Mi vialte caah lehnak pakhat lawng a um: “Zoh hmanh u, Pathian Tufa,
vawlei sualnak a kalpitu khi.” Johan
1:29.tlerlungthawng_sidebar_feed_AdSense3_1x1_as
Sualnak thilrit in luatawk a duhmi mi tampi nih hi biadik hi fiangte in
an hngalh khawhnak hnga Pathian Thlarau nih hmanmi thil tampi a nei. Esau kha a hlennak thawngin sualnak a tuah
hnuah Jakob cu a pa inn in a zaam tikah khan sualnak i a rih ning cu a
tuar. Hlawtmi le umhar in a um lioah le
a dawtmi thil vialte he i ṭhen in a um lioah a lung chung i a khat pengmi thil
cu, a sualnak nih Pathian he a ṭhenter
lai i Vancung in philhmi ka si lai ti a phannak hi a si. Ngaihchia ngai in vawlei ro ahcun dinh awkin
a zau; a pawng ahcun tlangbo hna lawng cu an um i a cungah cun a ceumi arfi hna
an um. A hon i hngilh i a mangah,
vancungin ceu phundang ngaimi nih hleithlak bangin a umnak le vancung kutkaa
thengte cu a hon peh; hlei cungah cun Pathian vancungmi hna cu an ṭum, an kai i
cu sunparnak a cung cun hnangamnak le ruahchannak aw cu a hong thang. Cu ticun,
Jakob nih a lung chung in a ruah pengmi le a saduhthahmi, a Khamhbawi cu
hmuhter in a um. Misual si ko
hmanhselaw, Pathian he i peh ṭhan khawhnak lam pakhat a um ti a theih tikah
lunglomhnak le hnangamnak in a khat. A
mang i a hmuhmi, hlei khuaruahhar nih hin Pathian le minung karlak ah
pehtlaihnak a umchunmi Bawi Jesuh a hmuhsak.
Hi kaa finaternak nih hin Bawi Khrih nih Nathanael sinah, “Van kha aa
hung i Pathian vancungmi hna cu Mi Fapa cung i an rung ṭum an kai kha nan hmuh
lai,” (Johan1:51) a timi ah khan a tling.
Dohnak ruangah minung cu Pathian he an i ṭhen cang i van le vawlei
pehtlaihnak zong cu a cat ve. An karlak
ah hawrkuang a um i, i biakchonhnak a um kho lo. Sihmanhselaw Bawi Khrih thawngin vawlei cu
vancung he an i peh ṭhan. Bawi Khrih nih
hi a thukmi hawrkuang cungah Amah velngeihnak in Hlei a donhnak thawngin minung
cu vancungmi hna he an i chawn kho ṭhan.
Bawi Khrih nih minung hna sualnak ah an tluk hnu i mider, bawmtu nei lo
an sinak in zeizong te ti khotu Hrampi he a peh hna.
Minung nih ṭhanchonak an ruahmi le
nuncan saanter awkah an i zuamnak ah hin a tluciami hna caah ruahchannak le
Bawmtu hna Hrampi kha an philh ahcun an i zuamnak vialte cu satlai lo a si dih. “Laksawng tlamtling paohpaoh hi vancung in an
si,” (Jeim 1:17) i , Pathian taa an si.
Amah tel loin Pa ṭhatling ziaza hi neih khawhmi a si lo. Pathian sin kalnak lam cu Bawi Khrih lawng hi
a si. Amah nih, “Lam le biatak le nunnak
cu keimah hi ka si; keimah sin in ti dah lo cun ahohmanh Pa sin an phan kho
lo,” tiah a ti. Johan 14:6.
Pathian nih hi vawlei cung i a fale hna cu thihnak in a ṭhawng deuhmi
dawtnak in a dawt hna. Amah nih a Fapa
a kan peknak ahhin van lei thil vialte hna cu thilpek pakhat ah komhin a kan
pek khi a si. Kan Khamhbawi a nunnak, a
thihnak le a kan halpiaknak; vancungmi hna rianṭuannak; vanmi vialte hna hi
minung nih khamh kan sinak hnga caah a herhmi le ai telmi an si dih.
Kan caah khuaruahhar raithawinak tuah a
simi hi ruat cio u sih! A tlau ciami
hmuh ṭhan awkah Pathian nih a tuarnak le kan Pa innah hruai ṭhan awkah ai
zuamnak cu ruat tuah! Thil ṭha tuah
ruangah ṭuanman sunglawi hmuhnak, van nomhnak hna temnak, vancungmi hna he
tlawnlen ṭinak, Pathian le a Fapa dawtnak chung i umnak, khuacaan umchung
viatle kan ruahnak le fimnak hna ṭhan pengnak ding hi vialte hna hlei in a ṭha
deuhmi ruahnak le thil tlamtling deuhmi zeihmanh an um ti lo caah hi kong hna
kan ruahnak hna cu a kan Sertu le a kan Khamhtu caah lungthin takte i a rian
ṭuan awkah a kan forhtu le thazang a kan petu an si hnga lo maw?tlerlungthawng_sidebar_feed_AdSense3_1x1_as
Cun, kamkhat leiin kan ruah ṭhan ahcun, sualnak ruangah Pathian
biacaihnak, hrial khawh lomi hremnak kong, kan ziaza a ṭumchuk chin lengmang
ning hna, a hnubik hrawhnak kong hna Pathian Bia chungah chimin an umnak cu
Sehtan nih a tuahmi thil hna lakin kan i ralrin nak hnga caah an si.
Kannih nih Pathian velngeihnak hi zei rel l in maw kan um ko lai? Hi hleiin kan caah zeidah a tuah khawh ti
hnga? Hi tluk khuaruahhar dawtnakin a
kan dawtu he i remte i um awkah i pe cio u sih.
Kannih nih Amah muisam he i loin kan i thlen khawhnak ding le, mi caah
rianṭuantu vancungmi hna he rianṭuan ṭiin Pa le Fapa hna he i remte um awk le i
hawikomh awkah, kan caa i chiah cangmi thil hna cu hmang hna u sih.
Comments
Post a Comment