Chunlai Ceu i Mei-inn Ceu

Kei dawtnak cu... Suisui caah cun, chun laicer i a ceumi mei-inn bantuk ceo a rak si―Zungzal Vakok.

Zungzal Vakok

***************

Khuaruahhar awkin aa dawhmi zingnu kutchuak kokek dawhnak, chanthar fimthiamnak nih a von t’amhmoih chapmi Malay ram hi cu… USA ka phanh hnu zongah ka ngai ruangmang tawn. Vawlei ah Lairam hi pahnih hei um sehlaw, Malaysia hi a pahnihnak cu si ko hnga, ka ti.

Zeicahtiah cun, kaa nuamh bal, lungrethei vansang au in ka um bal, thong chungah kaa kualh bal, mi hrokhrol nih an rak ka hlen bal, dam lonak in mah lawng ka hraam bal, mitkuh fee in zankhua ka rak dei tawn bal, lung kekkuainak in ka rak khah balnak ram a si caah a si. Malaysia nihhin ka mitthli zong a tlakter i a t’ah zong a ka ta’hter ruangmang bal.

Tuarnak phun kip a ka petu Malaysia hi aa dawhnak hlawi ahcun hlawi cawk si lai lo. KLCC, Langkawi, Penang hlei, Malacca khuahlun, Genting Highlands tbk cu minthang an si. Ram kip in miphun kip nih an hung fuh―aa dawh an ti cio. Asia Pacific ram hna lakah Tuluk changtu ah Malaysia a si, an ti.

Cu hmun dawhdawh hna lakah, Kuala Lumpur khua laifang i KTM(Keretapi Tanah Melayu) timi tlanglawng dinhhmun nganbik KL Sentral ko hi philh awk a t’ha lo. Ka tuanbia sertu ah aa tel caah a si. KL Sentral a hmunh chung ka thinlung nee ah a caam zungzal ko rih lai dah!

***************

Riandinh Ni, voikhat lio caan ahkhin a si. KL Sentral tlanglawng dinhmuhpi cu ka va phan.  Tonlonak a sau cangmi Sungai Buloh um ka pule tlawn ruah ah a si. Mi choklet an tam hringhran, Zarhpi Ni si caah si rua, hngerhte bu ko kan lo. A nak na, a raang na, aihre na, dum nawn um na. Cun tung niam he tung sang he aa lo lomi minung phun kan tling. Acheu cu duhsah tein lam an kal, acheu rang dutmat in. Cuticun thlanglei chaklei ah an ichok lulh cio.

A chel ah Kawl lubo pawl an kuanza khainak hmur sen le sen loin ka hmuh pah hna. Nain, Laimi mui belte pakhat hmanh an de lo.

Tlanglawng rat lai hngah pah in Seihnam Cazual kaa kau i thawngpang ka rel. Ka carelmi chung i lung lut nawn in ka von um hnik liote ahkhin, “Aku! Lar, hawhma tua htaing yah awng,” timi Kawlholh awpei nawn aw pakhat ka theih. Ka mitsiar in ka hei bih hna i nungak nu pakhat nih Kawlpa a hei chawnh khi a si. Nu muihmai cu ka mitmu chungah hmuh tawnmi a lawh caah dengteo deuh ka mit kaa tun i ka zoh hna. Kan Lainu bak a si hrim ko e.

Tlawmpal ah ka kiang ah an rung t’hu ko. Chawnh duak ka duh ngai hna nain, ka hmurkaa a chuak kho lo. Ka carel tu ah ka lung ka mer t’han. Anmah pahnih lawng an ihmuh khawh caah si men lai. Kawlram in a rami Laimi ka si ti hliah dawh cu an si ve lo. Tlanglawngpi a rat uahmah an hmuh bak khin, “Sui, htah, tua me,” tiah Kawlpa nih a von ti i minu ban cu aa hruai i tlawnglang kutka chungah cun an lut.

Zei pehtlaihnak hmanh kan ngei hna lo nain lung nuam lo ngai khin ka um. Kaa saing lo tukmipi ah ka lu khi vui tam nawn cu ka lei. Zei khuaruahmi pi ti theng khi ka ngei lo. Nain, “Kawlpa hna Lainu dawh tete nih nan komh hna hi cu mu, ka thin!” tiah phuhlut tiah din tein ka aw a chuak ko e.

“Ai!” ka ti i ka cal khi kaa domh. Zikzek tiah ka thluak ahkhin khuaruahnak khi an hung lut.

“Malaysia ah Laimi hi kan tam lengluang ko t’ung!” ti ka von ruat. Nain Imbi, Pudu, Samping, Lokeyew, Cheras phunphai Laimi a bu tete inn kan um hrawnghrang dah lo cun Laimi he ihmuhton hi a har ngai mu, ka ti. Cun, von ihmuhton sual hmanhah kaa khat chonh a tong lo ding zong cu kan tam mu. Kan sining tuak hrim ah “Malay ah cun nungak mangt’am a tlung” an timi bia hi a dik ko lo hlah i ti hna ka ruat.

Kaa cit ding tlanglawng a phanh rih hlei lo caah ka t’hutnak te cun ka to khirkher rih ko. Ka carel zong cu ka peh ve ti lo. Ka pawngkam cu cuan in khuahoi phun in kaa la. Ka mit nih t’uang lai ah card pakhatte a rilh ko khi a hmuh. Cu card te cu ka hei char zau i UN Card a rak si ko e. A min ka zoh, “Ly Ly Sui” ti si ko. “Sui” aa tel caah Laimi a si ding cu a fiang ngai. Ka zal ah kaa sanh i, CRC zung tu ah hei pe te ko hna ning ti in kaa lawipi.

Tlanglawng cungah cun khua khi ka hei ruat pah. “Muvi chung ka hmuhmi hna bang fidi le fitlaw an iton daan phun khin cun ka ruat fawn hna lo nain nute kha Lai nungak ka hmuhmi hna lakah aa dawh bik a si men lai” ka ti. Mah tluk Lai nungak dawhte khi Kawlpa reru von vaat te lai cu ka ti i ka zaang a raam ngai. “A paam bak!” tiah ka pawngtomi lei hoih in kaa chim sual i, Mirang tarnu nih “What?” a ka ti colh ve. Chim awk theih lo ah kakzuai in ka mirh i a ka mirh ve.