Na Palh Lo Kafa ( part 2)

Zan dai khuasik le zilthli kik lakah a nu cu lam kam te ah a it . Ih phah puanvurh a ngeih lo caah a khuasik tuk buin zanmui cu a liam.  Zing niceu dawhte a van hmuh than tikah thazang thar a la than. Lam kam i thadi zaangba ngai in a um lio caan ah a kiang te i a mah lawng a vakmi a ho hlawmtu ngei lo uico fate cu a hei hmuh. A hei dawi i a kor ngai cangmi le a thir thliahmah a kut nem za a van chanh i Uifate cu tarnu sin ah a hung ra. Uico te a van cawi i a tangnem cung a van chiah lio caan a fapa dawt kum 4 fai a si lio i a tangnem toi a pom lio a mithlam ah a hung cuang.

Uite zong cu tarnu tak lum cung a van um cun aa lawm tuk ve i mithmai panh tein a van conglomhmi a hmuh tikah a biangki cung in a mithli fim hna cu kurkur in an hung luang. A fapa dawt bang in aa zoh thla i a lawm tuk. A sinain a kawlmi bel a hmuh khawh rih lo caah kam khat lei in a ngeichia than. Mi nih an pekmi phaisa a ngeichun in rawl a cawk. A mah hmanh ei khim lo in uico fate cu a pek tawn. Mi nih an zoh ah zangfahnak in an khat hna nain a ho nih zuan hnawh a tong lomi tarnu caah nun cu a fawi ve hrim lo. Nikhat cu a dawt tukmi a uico fate zan nih a hngilh kar ah a rak tlau tak. A thaizing a van i hlau i a hmuh ti lo caah a mithli rual riat he a kawl len. Hmun kip le ka kip ah a kawl len a hmu kho ti lo. Zalampi ah a tahhram len cu lamkam aa chokmi zong nih an rak cuanh cio. Caan zau nawn a kawl hnu ah a uico te cu Tlangval note nih a rak tlaih kha a hmuh. A rannak in a va kal i tlangval mah hi keimah uico a si rak ka pe than tiah a hal. Tlangval pa nih a uico cu a pek duh lo caah a tap chih, mah tlawmpal ah a zangfak tuk than i a uite cu a van pek than. Mah tarnu cu a ho dah si hnga tiah a van zoh cu a rak hringtu a nu si kha a van i fiang.

A nu cu uite aa pawm i lamdang lei ah a kal. Tlangval pa cu company pakhat ah riansang tlai a si i a hawi le he Motorcycle in an vahnak a nu a hmuh cu a si. Lam lei kal khi a hei hmuh. Tlawmpal ah a fapa nih liamcia a tuanbia hna cu a van ruat than. A ngakchiat lio caan a hnukhal i a tah lio ah a nu nih hnukthlum a dinh lio caan, a ngeihchiatnak caan ah a lomhter can le a tangnem toi i a pom lio kha dar thlalang bih bang a sining vialte a van i hmu. Zalam pi cu tan in tarnu umnak lei ahcun a tli. Mizapi nih lam kam in an rak cuanh  hna (zei hen cu tlangval pa cu a va kal hnga) ti phun in an hei cuanh len hna. Tlangval pa nih a khup a bil i a mithli he a nu hmai ahcun a hung kun.

A fapa " Ka nu na fapa hi ka sual tuk hringhran, ka sek ka in harsatnak phun tling na rak tuar, thihnak thlankam dir in le a fakbik temtuarnak na in hnu ah kei nafa misual pa hi vawlei ah ka hungsem" a biangki in a mithli fim hna an tolh.

 A hrom a van i thianh ta.  “Bawhte ka si ka in ka cu zattiang ka duhnak tlinter naa zuam, ka lunglomhter cu na saduhthahnak nganbik a rak si zungzal nihin tiang in na dawtnak hi a dong kho rih lo" a fapa bia cu a nu dai tein a ngaih.

 A bia a peh rih " Ka nu nafapa ti awk hmanh ah ka tlak lo harsatnak phun khin le ningzahnak kan tuartermi cung ah ka ngaithiam " a celh lo a tap thluahmah.

 A nu nih a fapa cu a tangnem toi ah a van pom.

Caan sau nawn a van um hnu ah a thazang a van i hrim.

A nu " hi vawlei cung ah nangmah pakhat lawng hi kan ngeihmi na si e, ka fa, fa le nih nu le cung ah thil tha lo tuah ko hmanh uhlaw ngaihthiam cia nan si" tiah a van hnemh.

A nu " hringtu nu nih zeitin dah a fa dawt cu a hlawt khawh rua hnga, ka fa zeihmanh santlai lomi nihrut mi aa a simi na nu sin ah na rak kir than cu hinak hlei in ka nun chung caan tawite lomhnak dang ka ngei ti lo, kafa a liam cia caan kha philh ko cang,”

A fapa nih a tah buin a nu cu fek tein a kuh.  A Nu “ ka fa na tuahmi cung ah sual kan phawh hrim lo, na palh lo ka fa" tiah a van hnemh.

Lamkam aa chawkmi Mibu pi nih a langtlang in an rak zoh cio hna. Lunglomhnak mithli a luang an kiangkap cu zapei benghnak thawngpang nih khualipi cu a zelh dih ..

Tlerlung 
Melbourne