Siizung mi hlainak cabuai cung i
mizaw an hlaimipa cu duhsah tein a hun i hlau. A `ih ngaingai i a fahnak a
takpum nih a hngalh `han laimi kha a vun ruah ah a ther in a ther. A lung a
hung fim deuh, a kut cu a pahnih tein an tan hna ti kha a hun hngalh. Kut a
ngei lomi a si ko cang, a ban kha a hun zoh hna i zeihmanh an taang ti lo;
puanchia in an tuam hna i a puanchia raang lawng cu a hmuhmi a si cang ko. An
tannak hmui cu a zoh hna tikah a thling a kik, a lung a dong taktak, a kut cu
an um ti lo. Kut lo a si cang ko.
Ngaihchia lungfaak ngai in,
"Zeidah ka `hathnemnak a um ti, kut loin aho tal nih zei an tuah kho bal
maw? Ka nunnak cu a dih ko" tiah a ti.
Kha bantuk in a ruah kha a palh ko.
A nunnak kha a dih lo; a nunchung i aa lawmh cem caan le a va tlin cem caan cu
khaka ahkhan a hram aa thawk ceote a rak si. Kut pahnih tein tanpiak hnu i cu
batnuk si awk ding cu khuaruahhar taktak a si. A kut pahnih an tanpiak kha a
mang hmanhin a rak manh ngam bal lomi a hlawh tlinnak aa thawknak a rak si. Hi
tlangvalpa hi Harold Russell a si. Amah cu baisakup tlangval fitlaw minthang a
hung si.Ca`ial lei ah minthang a hung si i a cauk cu mi cawk duh cemmi a hung
si. A rak ngakchiat lio tein a rak duh mi a nungak kha a hun `hit i midang
tampi nih an mang hmanh phaak lo, hlawhtlinnak le lawmhnak cu a hun hmu.
Sihmanhsehlaw cu lio ahcun cu bantuk cu a si te lai ti kha a hngal lo. A
hngalhmi cu kut ngei lo ka si ko cang, zeihmanh a tuah kho mi ka si ti lo ti
lawng kha a si ko. Harold Russell hi Vawlei Ralpi Pahnihnak lio ahkhan
parachute ralkap senthum (sergeant) a rak si. Raltuk an cawnnak hmun ah
khawndennak a tong i a kut pahnih cu an lo. A fah a si, a lung re theih a si, a
awlok a chong ngaingai ko. Zeihmanh ka si ti lo ti a ruah ahkhan nun zong khi a
duh lo. Ka kut ahhin thir kut kaa va i bunh hna lai i cuticun ka nunchung paoh
ka hei um cang lai va si kaw, ti a ruah ko ahkhan a lungre a thei khun. Siizung
in a vun chuah lai i zapi lak i a hun i cawh ve lai hmanh kha a ruah in a ruat
ngam lo. Ka nun zongah zeihmanh a fufang ti lo; ka thih ko zongah zeihmanh aa
hlei lo ti in a ruah ko.
Nikhat cu siizung ahcun Charley
McGonegal nih a va leng. Charley cu Vawlei Ralpi Pakhatnak i raltuknak ah a kut
a rak hlo ve mi pa kha a si i cu pa he cun bia kha an vaa ruah lengmang i cu pa
nih cun "Russell an dawntu bik cu nangmah na si, na tei awk i a herh bikmi
cu nangmah na si" tiah a ti. "Na lung fahnak, na thin hunnak le na
`ihnak kha na tei hna awk a herh. Na sunghmi na hlohmi cu na sung ko cang; na
hloh ko fawn cang, zeiti hmanhin na tuah kho ti lo i cu caah cun ka sunghmi cu
ka sung ko cang; ka hlohmi ka hloh ko cang tiah naa ruah a herh ko" tiah a
ti. "Cun ca`ialthiam Emerson nih a rak chimmi cu: na sunghmi thil paoh
caah khan na miakmi a um ve ko ti a si. Hi bia hi nangmah ca zongah a `hahnemmi
a si kho ve" tiah a ti.
Cu bia a theih ve tikah Russell cu a
lung a hung `hawng in thazaang thar a hun laa. Major pa nih cun a chuah hna na
chuak deng ko lai tiah khin a hun hnemh i chuah lai a ruah ahcun a awlok a
chong `han. Zeitindah ka tuah lai, zeitindah ka um lai, zapi lakah ka vung um
ve lai i kut loin zeitindah keimah tein ka um ve khawh lai? ti kha a vun ruah
`han tikah cun a chim awk hrimhrim a hngal lo. Major pa nih cun a thawh `han i,
"Russell na lung chung i naa ken awk a herhmi cu kut bul ka si lo; kut kiak
lawng ka si ti hi a si'" tiah a ti.
Russell nih cun a zei hme ai dang;
kut bul si zongah kut kiak si zongah an i khat ko hen cu tiah a lung chungin a
ti. Asinain umharphen ah tiin an siizung caruuk ah a va kal i cuka ahcun
"kut bul" ti le, "kut kiak" ti a sullam cu a van zoh hna.
Kut bul ti cu zeihmanh tuah khawh ti lo ti khi a si i, kut kiak ti cu thil
tuahnak i dawntu ngeih, a har cu a har deuh nain tuah khawh `hiam`hiam ti khi a
rak si. Cu tikah a lungchung i a hung ummi cu a si ahcun caan ka ngeih rih ko
`ung; hlawhtling khomi ka si khawh rih ko `ung, a har cu a har deuh lai,
sihmanhsehlaw ka hlawh a tling kho ko, ti kha a si. Cu lungthin cu Charley
McGonegal nih na ngeih hrimhrim awk a timi kha a si. Cu caan thawk cun cu
ruahnak pahnih cu a lungchung ahkhan a chiah zungzal hna.
"Kut bul ka si lo; kut kiak ka
si, ka sunghmi thil paoh caah miakmi a um ve ko."
(Rev. Dr. David Van Bik `ialmi HNANGAMNAK FIANRIAL chungin laakmi a si.)
Comments
Post a Comment