PHUNGTHLUKBIA

1. A hrut nih fim chim

            Pakhatkhat nih palhnak an tuah i chimhhrin an duh tikah a lung nem seh, tiah biahram domhnak ah an chim tawn. A hngal lomi nih a hngal deuhmi chimh tinak a si.

 2. A it mang man, a hrak voih thei

            A itmi nih zeihmanh thei loin an it i a hrakmi nih voih zong an theih dih. A sullam cu a thi ciami hna le a kal ciami hna nih thil `ha lo an tuah taakmi cu a rung taangmi nih har lengmang in nehnang an fim i an `uan tikah an chim tawnmi a si.

3. A dil na, a sat na

            Mi pakhat nih `hatnak a tuahmi kha a dang pakhat nih a hrawkpiak lengmang tik i chim tawnmi a si.

4. A firtu ningzak hlah, a hmutu ningzak

            Mihrut le mi`halo nih sualnak an tuah tikah ningzah an hngal lo. Mifim le mi`ha nih an theih an hngalh tikah an ning a zak tinak a si.

5. A mui in zoh hlah, a aan in ngai

            Minung hi kan mui le kan sam nakin kan biachim le kan ziaza ah kan hruhfim, kan chiat`hat a langh deuh tawn caah mui le sam nakin biachim le lungput a biapi deuh tinak a si.

6. A nep na ah thawng dul

          Ka tei khawh pat tiah zei sual lomi mi`ia`um lo serhsat, ralchanh i, hnahnawhnak tuahtu hna cu a hnu deuh ahcun an thang`hat tawnmi hna hmanh kha mi ai an puanh, cun mi nih zei ah rel an si ve lo caah an thawng a dul, tiah chim tawnmi a si.

7. A paam sia zuat mualpho

          Misifak nih sia an zuat ahcun `ha tein an zohkhenh khawh lo caah an pung an zaam kho lo i an karh kho lo. Cu bantukin mipaam nih cun rian kha dawhcah le tlaamtling in an tuah khawh lo i an hlawh a tlin lo tikah an chim tawnmi bia a si.

8. A ruh tum hlah, a haang na hap lai

          Na rua na ram a si lomi kha va duh hlah, na hmu `ung lai lo i sunghnak chin tu a si lai, tinak a si.

9. Ar dum chim khel, ar raang chim khel

          Ar nak hmanh kha ar raang a si tinak sullam a si. Cu bantuk cun mihrokhrol nih a hmaan lopi zong kha a hmaan bantukin an chim tawn tikah an tahchunh tawnmi a si.

10. Bapi nih thak kaw bate tiang

          Bapi a thah bantukin bate zong a thak ve. Cu bantukin an nu le an pa, an hruaitu hna an `hat lo ahcun an fanau hna zong cu bantuk an si ve tinak a si.

11. Bia le lam phaan

          Kan chim lomi bia nih kan i tinh lomi kong pakhat chim caan a chuahter. Lam kan hrawn lengmang i, i timh lonak hmun ah va lenkai khi chim duhnak a si.

12. Biathli thlungpaar in au

          Biathli cu ahohmanh theihter lo dingin i chimh a si asinain pakhatkhat ah a thli tein mi chimh chin a si caah a puangthang i zapi nih theih in thlungpar au he aa khat tiah tahchunhnak an chim tawnmi a si.

13. Buluk umnak ti nawi, mihrut umnak khua nuam

          Buluk umnak ti cu a nawi zungzaal bantukin mimawlmok umnak ahcun a nuam ve ti duhnak a si.