Hi lenhloi hi vawlei cung sianginn tampi ah cawn a simi, vawlei cung
holh phun tampi ah leh a simi, atu tiang voi tampi chuah a simi, vawlei cung
roling lenhloi pakhat a si. Napoleon an timi le Snowball an timi vok nih an
hruai hna i saram pawl nih lothlopa Jones cu Manor Lo in an `hawl i Saram
Thamada Nai-ngan an dirh. Cu ram ahcun saram vialte kan luat lai i kan i tluk
dih lai an ti. Asinain khamhtu ah an ruahmi hna cu ahmasa an bawi misualpa
bantukin an haak a kau, an i uah i mi an rialdit ve. Ca`ialtupa nih fiangte le
nihchuak ngai in a `ial khawh caah hi cauk hi vanraangtoi in an duh dih. Upa
nihcun communism a `hatlonak nichuak a saihmi a si ti an theihthiam. Ngakchia
ca ahcun lo chung saram tuanbia nihchuak tukmi a si.
Manor Lo ngeitu Mr Jones nih a ih lai ah ar inn a
khar. Cun ihkhun ah a von i hlonh. A
nupi cu a hnar hluahmah cang.
A ihnak khaan mei a mih caangka in a lo chung dihlak in thawngpang le
cawlcangh thawng a um. Chun ah an i caih lenmi bia a um. Mr Jones aa hngilh karah
rawlruuk nganpi ah me`ing kan tuah te lai tiah khua an rak khaan.
Tarpa Major cu rawlruuk
khatlei hriang donhhlei cung faphal phahmi ah siarem ngai in a bawk. Kum
hleihnih a si cang i naihrawng cun
a thau ngai. Asinain rumra ngeimi vok a si. A hao an tan bal lo nain mifim le
mi zaangfah thiam ngaimi muihmai a ngei. A rauh hlanah saram dang zong cu an
hong phan cio i anmah siaremning cio in an um.
A hmasa bik ah Bluebell, Jessie
le Pitcher an timi uico pathum an
phan. A changtu ah vok an phan i donhhlei hmai faphal phahmi cungah an bawk. Ar
pawl cu thlalangawng tlaang ah an `hu. Laileeng pawl cu vok umnak hnulei ah an
bawk i an rawlret an khai pah. Leeng
hnuuktu rang pahnih an ra`i. An min ah Boxer le Clover an si.
Duhsahte le ralring ngai khin an ra. An ketin pipi in faphal tang i a ummi
thilnung dang kan lamh sual lai ti an phaang.tlerlungthawng_sidebar_feed_AdSense3_1x1_as
Clover cu rangnu nganpi
nucan taktak a si. A chancheu a phan deng cang. Fa pali a ngeih hnucun a pumrua aa rem tuk ti lo. Boxer cu rangtum nganpi a si i
sumh 18
hrawng a sang. Rangtum dang pahnih fonh tlukin a `hawng. A hmai hi a
raang in a `ial i hruh a phur ngai. A fimmi zong cu a si ve hrim lo. Asinain
ahopaoh nih an upat dih. Zeicahtiah miding a si i rian`uanah an i bochanmi a
si. Rang an phanh hnu-ah Miriel an timi meheh le Benjamin an timi la an hung phaan. Benjamin cu lo chung um saram vialte lakah a tar bik i a thin
zong a chia bik. Miholh lo a si, a holh tik paohah mi soinak bia chim a hmang.
Lo chung saram lakah amah lawng hi a ni bal lomi a si. Zeicahdah na nih bal lo
anti tikah zeihme nihawk cu a um le a ti. Asinain Boxer cu a tlaihchan
ngaingai. Ka tlaihchan ti bel hi a chim duh bal lo. An pahnih in Zarhpini
zanlei ah theihai cinnak pinlei, hawi umlonak ah ram an `am`i tawn. Holh loin.
Rang pahnih an bawh caangka in compei fatete an hung phaan. An nu nih a
thihtaak cang hna. Anmah tein ciap pah
in `hutnak `ha an kawl len. Saram dang lamhchih lonak dingte ah an um. Clover nih a hmailei ke kha vaampang ah a serpiak hna
i cu chung ahcun compei fatete cu an `hu i a rauh hlanah an i hngilh colh. A
donghlei ah Mollie an timi rangnu
dawhte a hrut nawnmi mu`hai hmawm pahin a ra. Hawi hmaiah a `hu i a tuang
raangte le a ribbon sente a tongh lengmang. Mi nih an hmu lo sual
lai ti a phaang. Ahnu bik cem ah chizawh a phaan. Voidang tawn bang a kenkip a
zoh i a lum biknak hmun Boxer le Clover
karah aa tenh. Cuka hmun cun a ngeu
pah lengmang i Tarpa Major chimmi bia
khom a ngai lo.
Moses tiah an auhmi langak nganpi chim lo cu an
chuak dih. Anih tucu inn hnulei innka phen ah aa hngilh. Major an timi Tarpa nihcun
saram vialte rem tein an `hu cang ti a
hmuhin biachim hram a thawk.
“Kawile, zahan zaan ka mang cu
nan theih dih ko cang. Ka mang tucu a hnu deuhah ka chim te lai. Kawile, atu hi
saupi ka nung ti lai lo. Hi vawlei cung i kan nuncaan le a nungmi saram vialte
kong hi aho tluk paohin ka hngalh dih ka ti ko lai. Hi kong hi kan chimh dingmi
hna cu a si.
“Khah, kawile, kan nuncan le kan khuasak hi zeibantuk dah a si? Kan re
a thei. Kan chan a tawi. Kan chuahka in nunnak men in rawl an kan peek. Rian a
`uan khomi nih kan tha a dihdongh tiangin rian kan `uan. Rian kan `uan khawh ti
lo le san kan tlaih ti lo le caangka cun zaangfahnak apel hmanh um loin an kan
thah. England ram saram vialte kumkhat kan si hnu paoh cun dinh ni le nuamh ni kan ngei lo.
England ram saram a zalenmi kan um
lo. Saram pawl kan nuncan le kan khuasak cu harnak le salsinak a si. Hihi a
fiang bakmi a si.
“Hihi vawlei cung kokek sining maw a si hnga? Kan vawlei hi a chia tuk
le maw a cung i a ummi a kan cawm khawh lo? Sihlah, kawile , si hrimhrim hlah.
Voi thongkhat in a silo ! England ram vawlei hi a `ha tuk. A khuati zong a `ha.
Atu England ram i a ummi saram nak tam deuh duhdim tein rawl a kan peek khawh
ko. Hi kan lo pakhat hmanh nih rang
dozen khat, caw pakul, tuu za tampi a kan cawm khawh. Kan ruah khawh lengin
nuamte le siarem tein a kan cawm khawh. Asiah zeicahdah hitihin sifaak le nuam
lo ngai in kan um peng? Aruang cu kan thazaang man ti le rawl vialte hi minung
nih an fir dih caah a si. Khakha, kawile, kan harnak le kan retheihnak vialte a
ruang cu a si. Biafang pakhat tein ka chim ahcun “Minung” an si. Minung
lawnglawng hi kan ral taktak cu an si. Minung hi kan `hawl hna a si ahcun kan
retheihnak le kan rawl`aamnak hi a zungzal in an lo lai.
“Minung lawng hi `uan loin a eimi an si. Ahnuk zong sur awk a `ha lo.
Ati zong ati fawn lo. Lei zong a thuang kho lo. Saveh a tlimi hmanh a tlai kho
lo. Asinain saram vialte bawi a si. Rian a `uanter hna. Thi lo ding men in rawl
a peek hna. Adang vialte amah nih aa
laak dih. Kan thazaang in vawlei kan cawh. Kan ek nih non a toih. Asinain kan vun chim lo kan ngeihmi a um lo. Atu kan
hmai i kan hmuhmi hna caw pawl, cawhnuk hi pawng thong zeizatdah nikum ahkhan
nan chuahpi? Kha hnuk liangluang kha khoika ahdah an si dih? Cawfa nih vuaite
in ding hna sehlaw cawfa lom pipi kan
ngeih hna hnga. Kha cawhnuk kha adidor tiangin kan ral a simi minung or chung
an phaan dih. Arpi hna, tukum ti pum
zeizat dah nan tit? Cu lakah pazeizat dah nan keuhter? Adang vialte cu Jones
le a hawile nih market ah an zuar i tangka tampi an hmuh. Cun nang Clover khoika ah dah na hrinmi rangfa pali kha an si.
Na tar tikah an zohkhenhtu ding an si hnga. Kumkhat an si ah dawh an zuar hna
khah. Zeitik hmanhah na hmu ti hna lai lo. Voili fa na hrin le lo chung rian na
`uan man zeidah na hmuh? Rawl tlawmpalte le na riahnak inn chim lo ah?
Kan sifah le kan retheih bu-ah kan chantling hmanh an kan nunter lo.
Keimah tucu van`ha leikap ka si. Atu hi kum
12 ka si cang i fa 400 nak tam
deuh ka ngei cang. Khakha vok i kan sikel ning cu a si ko. Asinain a donghnak
ahcun thah a tong lomi saram kan um lo. Nan nih ka hmai a `humi vokthau pawl,
kumkhat ahcun thah nan site lai i nan ngeek tuk lai ning cu amak. Cubantuk `ihnung cu kan ton cio lai.
Caw, vok, ar, tuu, kan dihlak. Rang le ui zong an luat hlei lai lo. Boxer, nangmah zong na tit le na
thazaang a um ti lo le caangka in Jones
nih rangthatpa sinah an zuar lai. Nannih ui pawl, nan tar tik le hna nan ngeih
lo tikah Jones nih tlakrawh an oih
hna lai i a nai bik tidil ah an thlaak dih hna lai.
“ Kan nuncan chia vialte hi minung `hatlo le puarhraannak in a chuakmi
an si. Minung kan hloh a si ahcun kan thazaang man eidin vialte cu kanmah ta a si
ko lai. Zeidah kan tuah kun lai? Chun he
zaan he, kan thinlung le kan thazang dih lakin minung kan hloh lai! Ka chim
duhmi cu, kawile, hihi asi. Ka ke tangah faphal a um ka hmuh bantuk in a tuanah
maw a tlai deuhah dek ral cu kan tho hrimhrim lai. Cu kong cu ruat peng uh.
Abikin ka bia hi nan fale chim hna uh. Cucun pei kan fale chan talah ral kan
tei lai cu.
“Cun, kawile, zeiti bia an in el hna hmanhah nan lung vaivuan hlah seh.
Minung nihcun amah ca dah tilo cu aho ca hmanh a ruat lo. Kanmah saram chungah
lungrualnak le i dawtnak a um lawngah ral kan tei lai. Minung vialte hi ral an si.
Saram vialte hi hawikom kan si.
Cuvial ahcun awnh le authawng a thang. Tarpa Major bia a chim
lio-ah zu ngan pipi pali an kua in an hong chuak i an hnulei ke in an dir i bia
an ngai. Uico nih an hmuh hna i an zuanhhnawh hna. Zu hna cu an phirphahlikin
an zaam i an khur ah an lut manh. An marzaannak nih a khamh hna. Major
nih dai uh ti canah a hmailei ke a von cawi.
“Kawile, zu le saveh pawl hi kan hawikom maw an si kan ral dah?
Kutthlirnak cu an von tuah colh. Pali lawng nih an duh lonak me (vote) an peek.
Cu hna cu uico pathum le chizawh pakhat ansi. Ahnu-ah a kaphnih in me an peek
ti an theih.
“Chimding tampi ka ngei tilo. Ke hnih ngei paoh kan ral a si. Ke li
ngei asilole thla ngei paoh kan hawikom a si. Saram asimi paohpaoh nih
innchungah nan um lai lo. Ihkhun ah nan it lai lo. Hnipuan nan i hrukaih lai
lo. Kuak nan zuu lai lo. Zuu nan ding lai lo. Minung tuahmi paoh hi thil `halo
a si. Cun abikin, saram a simi paohpaoh nih saram dang a namneet lai lo, a nautat lai lo.
“I, atu cu, kawile, zahan zaan ka mang i ka sakmi hlamin
cu “England Ram Saram” ti asi.” tlerlungthawng_sidebar_feed_AdSense3_1x1_as (RICHARD ZATU nih GEORGE ORWELL `ialmi ANIMAL FARM, The New Windmill Series a lehmi chungin laakmi a si.)
Comments
Post a Comment