HAWI KAWM THA NGEIH NA DUH MAW?

Minung hi hawikom lo le mibu lo in um khawh kan si lo. Mibu sin ah ai pawlkom khomi khi mifim an ti hna i an nunnak zong ah hawikom ngei lomi hna nak in an thangcho deuh hrimhrim. Innchung lawng ah (phundang in mah rian lawng ah ai benh) lengmangmi minung cu hawi nusal pasal thluak cu an tluk deuh hrim  lo. A cheukhat  cu an fimtuk ko, catampi an rel nain an carelmi le an fimnak kha mibupi caah hmang lo in thlankhur an an ciam lan tawn ko. Cu bantuk fimnak le cawnnak cu santlai lo ah a cang zaang a ram tuk fawn.

Cu caah a ho minung he pouh i hawikom khawh hi a tha bik hlei ah kan herhtukmi a si fawn. Kan pipu phungthluk ah an rak chimmi cu “Hawikom tha cu sui le ngun an si” tiah an rak ti. A hmantuk palia cucu a ho pouh nih kan duh I keimah catialtu pa zong hawikom tampi ngeih cu kai zuam. Ka herh I ka duh tuk fawn hlei ah ka caah bawmtu tha bik zong an si. A si ah teh zeibantuk in dah hoikom cu kan ser ne hna lai aa foi lai maw? Biahalnak a um kho. Hawikom ser hi  a fawi ko dahkaw. Na lungdong hrim hlah hawikom thasernak ding ah a herh ngaimi biathli kan chim hna lai mu. Mah hi na tuah ahcun na naak upa mifim pipi le na naak mihrut le ngakchia he zong nan I pawlkom kho hna lai tiah ruahchannak ka ngei. A pakhatnak ah theih na duh ngaimi kha ruah lo in Facebook in maw a si lo ah hmaitonh zong in nan I tong hnga, nangmah na konglam a tawifiang le cun a mah na ton duhnak kha chim ko. Mithmai tha te le panh tein  pek khawh i zuam. Cun bia a chimmi kha tha tein ngaih piak law, na lungtlin deuhmi bia a chim ahcun na lu suk piak. Mah nihkhan ruah lo in milung thin a rak tongh ngai . A si lo cun a tha tuk tiah cikhat te a bia tan ko. A sinain a biachim lio ah nangmah duhmi bia kha lakhluak in chim kha nai ralring lai. Cun na tonmi minung kha a zawnzam zohthiam a hau fawn. Zeilei dah a huam phun a si timi a sining theih piak kha a biapi taktak. Tahchunhnak ah catial huammi a si ahcun a catial ai thoknak le a mah nih ai tinhmi le na theih khawh tawk, cun a ca hna na rel pah ahcun lomhnak bia kha hei chim pa . Mah ti khan mikip zong an mah le sining cio (Hoppy  ) ning cio in na theih I na hal i na komh hna ahcun mah kha na hawikom tha ah an cang lan ko lai. Nan hawi le he bia nan i ruah tikah  nan bia ai khah lo ahcun bia el va thawng tuk hlah mihrut an in ti lai. Fim ko bu hruh coter cu namtong a bilhmi in ngalpacar tuknak in a fak deuh.  Bia na chim tikah a herh lomi tamtuk va chim kemh hlah mipi nih na bia ngaih an huam sual ti lai lo.

Nungak Tlangval Caah Thieh Awk

Cun nugnak le tlangval i komhnak ah  a biapi tukmi cu ruah lo in nu pakhat maw, pa maw nan I tong hna,  na lung chung in mah nu/pa nih an ngiat pah a si ahcun komh khawhnak ding caah nangmah nih I theihternak tuah hmasa law a sining kha a tawi fiang in hal mah hnucun nangmah zong nih na sining tawi fiang in chimh khawh  I zuam. A biapimi cu nangmah nih lam na sial hamsa a hau lai.Tlangval na si ahcun a thianghlimmi copa hna kha hei seih piak ko law cun a duhmi kha theihh khawh piak I zuam. Nu cu thazang pek a  duhmi an si ti kha philh hlah. Cun nan I chonh tik ah mithmai tha te pek khawh I zuam zungzal. Na duh ko zong ah I duhdawtnak bia chim kha hnawhhnam tuk fon hlah! Cun nan i ralring dingmi cu na duh tuk lem lomi nungak/tlangval maw sin ah duhnak bia chim kha vai sum ko thluachuah pihnak a si. Na duh bakmi a si ahcun a kum in a ruah zong ah na lung dong bak hlah. Pah chih tualmal ko. Mah nu/pa kha a lawng ko rih ahcun na co khawhnak ding in I zuam ko. a lam tampi in I zuam law na co khawh caan a um te ko lai. Laimi cu kan lung dongh a tuan tuk tawn caah duhmi co hi a harp ah cheukhat ca ah ka ti bia. A ruang cu duhnak nawl cu mivial te nih kan ngeih dih I Pathian zong nih nu le pa cu ai fonh ding hrim in an kan khaukhihmi kan si. Na hawinu/pa nih harnak a ton maw a si loah a lungrawhnak a ngeih sual ahcun na si khawh chung in bomh I zuam ko. Zeipi na tuah piak khaw lo hmanh ah hmurka tein a tuarmi cung ah na lungthat lonak kong kha langhter ve ko. Minung cu chawva in i hnemnak in hmurka te I hnem law harnak ton caan I tuarpi kho tu hi kan caah a rak sunglawi deuh suomau tawn. Nungak pawl tlangval kip nih an in chonh hna lai hmurka tha peng zungzal hna uh a sinain nan thianhlimnak kha cu vainam kaphnih har hmai hmanh ah va zuar hlah uh. Na pasal caah na parhmuinak kha chia zungzal ko law tlangval nih an in helh tik ah zeitik hmanh ah a phi pek ah vai hnawhhman hlah. Na theihh tuk lomi pa hna  a si ahcun nai ralrin hrim a hau lai. Pasal ding ah a tha mi cu nangmah cung ah a thinfualmi le an theihthaim kho tu si ding kha a biapi tuk. I helh lio ahhin a si khawh ahcun mah sining hi I chim I le theihthiam hi a rak   a tha bik ko. Tlangval maw/nungak nan neih ahcun an mah sin ah an sining kha tampi va hal len duh hna  hlah a ruang cu minung hi kan mah sining kan I chim tikah kan hatnak lawng I chim asinain kan chiatnak hi chim kan I harh ngai tawn. Cu caah a mah he ai neih niam deuh sin ah langsar tuk lo in na darling kong kha theihh khawi I zuam ko.

Zapi he Nunzia Thiam

Zatlang bu sin kan um tik ah pakhat le pakhat I theihthiamnak hi a biapi tuk hringhran. Ngakchia na si ko zong ah upa pakhat ton na duh hna ahcun va tih hrimhrim hlah. Upatnak te he va chonh bia law bia nan I ruah tik ah nangmah nih na ton hna lai caah nangmah kha biatampi va chim len hlah. A mah sin tu in a bia chim kha ngai ko. Na  fian lo mi le theih na duhmi a um a si ah cun hal ko. Na nak upa lungfim he nai komh ahcun fimnak tampi nai chap lai. Cun pakhat theih awk ah a herh rih mi cu na hawi nih a huam ngaimi kong an ceihmi pi nain mah kha kho kha nang nih na haum phun a si hnga lo, tahchunnak ah Bawlung chuih huam ngai a si, nang kha music lei hna na uar ngai hnga a sinain a bia kha tha tein ngaih piak khawh va zuam ko.  Cun hawikom tha ngeihkhawhnak ding ah a biapi bikmi pakhat cu mi min cinken khawh hi a si. Min  cinken hi mi upat nak lakah a sangbik pakhat ah ai tel ve mi a si. Saupi nan i ton ti lo hnu a mah nih an philh ko hmanh ah ruah lo in nan i ton hnu ah  a min fangkek bak in na auh ahcun a lungkil ah na tap than lai. Na hawikom hlun thing hna kha nai manh caan ah a si lo ah na van ruah zawnkhan cakuat te maw a si lo ah ph zong in hei chonh tawn law mah khan nan pahnih kar pehtlaihnak tlaichannak le dawtnak kha a thar in a fek than lai. Mi he nan i sik tikah ngaihthiam hal kha vai nautat hirmhirm hlah Jesuh khirh nih nunnemnak a kan cawn piak. “Na ral kha an caah thla va campiak hna” tiah fiang tein an kan cawn piak. Cun mi chimh cawnpiaknak kha va nautat bak hlah a ruang cu na caah a tha mi tampi a um kho.

Biafunnak

 Ngakchia sin zong ah fimnak cu vai lak ko. Mifim nih an chimmi cu “Zeitluk hmanh in vafim ,thil va thei hmanh law vawlei cung sining cu na thei kho thlu kho naisai lai lo” tiah an ti. Hi ti na tuah ah cun hoikom tha na ngei lai  nangmah zong mi nih  an in bochan lai . Mah  capar hi keimah nih ka hmuhtonmi chungin tlawmpal ka van in siaherh ve  mi hna a si.  Fimthiam I cuh cu a si hrim lo.

Sang lian Thawng@Tlerlung